„Град Скопје нема под ниту едни услови да го изгаси јавното осветлување на улиците и булеварите под надлежност на градот“, изјави денеска скопската градоначалничка Данела Арсовска. Ова е нејзниот одговор на препораката на Владата, градот Скопје и општините да направат распоред по кој половина од улиците и булеварите ќе го исклучуваат јавното осветлување, наизменично, преку еден ден. Препораката требаше да важи од 01 семтември до 31 март догодина.
Одлуката да не се исклучува јавното осветлување е во насока на безбедноста на граѓаните, вели Арсовска.
„Ќе направиме се што е возможно, да се намалат трошоците за електрична енергија, меѓутоа не врз грбот на граѓаните и со тоа што ќе биде загрозена безбедноста и сигурноста на градските булевари и улици“, вели таа.
Арсовска вели дека градот ќе донесе свои мерки за штедење, а дел од нив веќе се применуваат.
„Започнавме со процес на намалување на интензитетот на лед светлата на уличното осветлување и тоа до максимум 70 проценти од моќноста, а во насока на штедење на електрична енергија. Ќе се приспособат системите за осветлување на одредени временски интервали, согласно соодветната потреба во текот на деноноќието, а се пристапува и кон етапна замена и користење на лед светилки, кои трошат за 85 проценти помалку електрична енергија од обичните светилки“, изјави Арсовска.
Дадени се насоки, рече Арсовска, за ограничување на се што се смета за осветлување кое не е од животно значење, како што е ограничување на осветлувањето врз јавните згради и рекламите.
Секоја општина, според Арсовска, си креира сопствени мерки за штедење, затоа што имаат автономија во своето одлучување, додека Градот Скопје, како што посочи, донел само краткорочни и долгорочни мерки кои што треба да придонесат за штедење на електрична енергија и преминување кон транзициони и обновливи извори на енергија.
.webp){kind=icon}
