Раст на прометот во индустријата за шест отсто на годишно ниво

Раст на прометот на индустријата во април на годишно ниво, пресмета Државниот завод за статистика (ДЗС). Поточно, споредено со ланскиот април, индексот на промет во индустријата се зголемил за шест проценти, но во однос на претходниот, месец март, ДЗС пресмета намалување од 7,9 проценти.

 

 

Анализирано по групи, а на годишно ниво, најголем раст има кај капиталните производи, за 11,6 проценти и преработувачката индустрија за 6,6 отсто. Кај трајните производи за широка потрошувачка прометот е зголемен за 5,3 отсто, а интермедијарните производи (освен енергија) забележаа раст на прометот од четири проценти. Рударството и вадењето камен е во дебел минус од 9,4 проценти годишен пад на проментот.

Преработувачката индустрија има повеќе потсектори, а со тоа и различни остварувања. Меѓу победниците (анализирано на годишно ниво - април 2025/април 2024 година) се секторите производство на прехранбени производи (+8,2 отсто), производство на кожа и слични производи од кожа (+20,2 отсто), производство на електрична опрема (+18,7 проценти), како и производството на моторни возила, приколки и полуприколки, чиј индекс на промет е речиси удвоен.

 

 

Најголемите губитници во преработувачката индустрија се секторите: производство на облека, чиј пад на прометот достигна 21,3 проценти, производството на фабрикувани метални производи, освен машини и опрема (-7,6 проценти), како и производството на основни фармацевтски производи и фармацевтски препарати (-10,6 проценти).