.webp){kind=icon}
Бугарија ќе обезбеди за Македонија 200 мегавати на час струја заклучно со 31 март. Оваа струја е во рамки на барањето на Стопанската Комора на Македонија за обезбедување колични за македонското стопанство. Комората бараше околу пет гигавати енергија дневно за потребите на македонските компании.
Количината беше договорена на денешната работна средба на македонскиот премиер Димитар Ковачевски и неговиот домаќин, техничкиот премиер Галаб Донев. На средбата присуствуваа и министрите за економија и енергетика од двете земји, првите луѓе на енергетските компании, како и претседателот на Стопанската комора на Македонија, Бранко Азески.
„Бугарија располага со големо домашно производство на струја од различни извори и може да излезе во пресрет на барањето на Макеоднија и да помогне земјава да обезбеди струја за стопанството“, рече бугарскиот премиер.
„Веќе до среда ќе се формира работна група составена од надлежните во двете земји која ќе треба да ги дефинира техничките параметри и цените за струјата, согласно законодавствата на Македонија и Бугарија и европските регулативи. Но, тоа ќе биде по цена која ќе биде под берзанската, оптимална и соодветна за македонските компании“, рече Ковачевски.
На средбата е разговарано за непречено функционирање на интеконекторите за да не дојде до недостиг на струја, а Бугарија ќе обезбеди и складишта за резреви со течен гас за земјава. Гасот кој ќе биде складиран во Бугарија ќе биде од терминалот во Александропули во Грција.
Според денеска договореното во Бугарија, сите деталите треба да бидат прецизирани за две недели.
Паралелно, на располагање ќе биде ставена и централата ТЕТО која ќе произведува топлинска енергија за 55.000 домаќинства во Скопје и струја за стопанството, вели премиерот Ковачевски. И електричната енергија од обновливите извори на енергија ќе биде насочена исклучива за стопанството.
За регулираниот пазар пак, државата заедно со ЕСМ прави напори во функција да ги стави сите домашни капацитети во текот на зимската сезона.
Известува од Софија, Република Бугарија
