Федералните резерви ги задржаа каматните стапки, Пауел останува гувернер

Федералните резерви (Фед) ги задржаа каматните стапки непроменети, но по одлуката стана јасно дека се продлабочиле поделбите околу идните чекори во монетарната политика поради растечката неизвесност предизвикана од конфликтот на Блискиот Исток.

Четворица претставници на Фед гласаа против одлуката, при што тројца се спротивставија на формулацијата во соопштението, објавено по состанокот, која сугерира дека централната банка на крајот ќе продолжи со намалување на стапките.

На прес-конференција, претседателот на Фед Џером Пауел рече дека има намера да остане во централната банка како член на Одборот на гувернери. Тој наведе дека претставници на Министерството за правда за време на викендот му потврдиле дека нема повторно да ја покренуваат контроверзната кривична истрага против централната банка, освен ако внатрешниот надзорен орган на Фед не го препорача тоа.

Претседателката на Фед на Кливленд, Бет Хамак, претседателот на Фед на Минеаполис, Нил Кашкари и претседателката на Фед на Далас, Лори Логан „го поддржаа задржувањето на целниот распон на федералните каматни стапки, но не го поддржаа вклучувањето на сигнал за олабавување на монетарната политика во соопштението во овој момент“, соопшти одборот.

Гувернерот Стивен Миран издвоил мислење, залагајќи се за намалување на каматните стапки за 0,25 процентни поени.

Ова е првпат од октомври 1992 година четворица претставници да гласаат против одлука на Федералниот комитет за отворен пазар - ФОМЦ (FOMC). Комитетот ја задржа референтната каматна стапка во распон од 3,5 отсто до 3,75 отсто.

S&P 500 и американските државни обврзници продолжија да паѓаат по одлуката на Фед.

Во пресрет на состанокот, инвеститорите и економистите главно очекуваа дека Федералните резерви ќе ги задржат каматните стапки непроменети до крајот на годината.

Претставниците направија мала измена во соопштението, наведувајќи дека случувањата на Блискиот Исток придонесуваат за изразена неизвесност околу економските изгледи. Претходно наведуваа дека последиците од конфликтот врз економијата се неизвесни.

Тие ја повторија формулацијата што се однесува на „обемот и времето на дополнителните прилагодувања“ на каматните стапки. Креаторите на политиката трипати ги намалија стапките во последните месеци од 2025 година.

Bloomberg

Овој состанок веројатно беше последен за Џером Пауел на чело на централната банка, откако Министерството за правда на САД ја запре контроверзната кривична истрага против Фед, отворајќи пат за потврдување на именувањето на Кевин Ворш за следен претседател на централната банка.

Ворш ќе го преземе раководењето додека американско-израелската војна со Иран продолжува да ја поттикнува неизвесноста меѓу деловните лидери и економистите. Наглиот раст на цените на енергенсите се заканува дополнително да ја поттикне веќе високата инфлација, додека дополнителниот притисок врз потрошувачите може да го забави растот и да доведе до отпуштања.

Такво сценарио претставува кошмар за централните банки: висока инфлација истовремено со раст на невработеноста, што ја влече монетарната политика во два спротивни правци.

Засега, стапката на невработеност делува стабилно. Сепак, нето-вработувањето во текот на изминатата година речиси стагнира, што го прави пазарот на труд ранлив на потреси, велат повеќе креатори на економската политика.

Во меѓувреме, инфлацијата веќе пет години е над целта на Федералните резерви од два отсто. Цената на нафтата Брент достигна највисоко ниво од јуни 2022 година. Иако ниту еден претставник на Фед не изјави дека очекува следниот потег да биде зголемување на каматните стапки, некои сакаат да сигнализираат дека и таква можност останува отворена.

Извештај објавен претходно овој месец покажа дека инфлацијата на потрошувачките цени во март нагло пораснала, најмногу во речиси четири години, поради рекорден раст на цените на бензинот. Тој скок засега главно е ограничен на енергенсите, но компаниите и економистите предупредуваат дека колку подолго трае војната, толку е поголема веројатноста инфлацијата да се прелее и на стоки и услуги што не се поврзани со енергијата.

Во меѓувреме, на Ворш му е отворен патот за потврдување на именувањето откако републиканскиот сенатор Том Тилис го повлече своето противење поради истрагата на Министерството за правда.

Одборот на Сенатот за банкарство во средата гласаше номинацијата на Ворш да се проследи до Сенатот.