Се ближи крајот на кампањата на американските Федерални резерви (ФЕД) за подигнување на каматните стапки, смета Мајкл Вилсон, стратег од „Морган Стенли“ (Morgan Stanley).
„Показателите, вклучувајќи ја и кривата за принос на десетгодишните и тримесечните државни обврзници, како показатели на рецесијата, ги поддржуваат потезите на ФЕД со став дека е подобро тоа да се случи побрзо отколку подоцна“, напиша Вилсон во својата анализа. „Според тоа, овонеделниот состанок на ФЕД е клучен за напредок, пауза или дури и крај на растот“, додаде Вилсон.
Сите очи ќе бидат вперени кон американската централна банка, за која се очекува дека в среда по четврти пат ќе ја зголеми каматната стапка за 75 базични бодови, додека инвеститорите ги одмеруваат зборовите на претседателот на ФЕД, Џереми Пауел, во обид да пронајдат насоки за идните потези на банкарите. Американските акции пораснаа во текот на последните две недели, додека трговците ги анализираат економските показатели барајќи знаци од влијанието на ФЕД, дури и откако разочараа заработките на големите технолошки компании.
Bloomberg Mercury
„Овој вид на движења на цените не е невообичаен како што се приближуваме кон крајот од циклусот, особено затоа што ФЕД се приближува кон крајот на својата кампања за заострување на монетарната политика, нешто што сметаме дека се наѕира“, рече Вилсон, кој е рангиран како најдобар портфолио-стратег во најновото истражување за институционалните инвеститори. „Заздравувањето ќе се задржи додека не се повлечат значајно добивките од акциите во следните 12 месеци“, додаде Вилсон.
Од друга страна, стратезите на „Голдман Сакс“ (Goldman Sachs Group Inc) велат дека потенцијалното поместување во темпото на затегање на монетарната политика од страна на ФЕД, заедно со благото позиционирање и предвидувањата за силно четврто тримесечје, стојат зад растот на берзите во последната недела.
„Во вкупно 17 пада на берзите од 1970 година, индексот S&P 500 растел во просек за 15 проценти во период од 44 дена“, напишаа стратезите предводени од Дејвид Костин.
Аналитичарите од „Морган Стенли“ очекуваат дека S&P 500 ќе порасне на 4.150 бода, што е за околу 6 проценти повеќе од нивото на кое ја заврши минатата недела.
Минатата недела Вилсон рече дека мечкиниот пазар веројатно ќе заврши некаде во првиот квартал следната година. Според „УБС Глобал велт менаџмент“ (UBS Global Wealth Management), не е можно да има олабавување на политиките на ФЕД, со оглед на многу високата инфлација во САД.
„Очекуваме дека ФЕД ќе продолжи со агресивното покачување на каматите сѐ додека статистичките податоци не покажат дека инфлацијата се намалува“, напишаа стратезите од „УБС Глобал велт менаџмент“, под водство на Марк Хефил. „Дури и кога ФЕД конечно ќе престане да ги зголемува каматните стапки, вреди да се спомене дека монетарната политика веројатно ќе остане на рестриктивното ниво уште некое време“, додаваат аналитичарите.
.webp){kind=icon}
