Цената на одлуките и вредноста на парите - Пет вести

Федералните резерви (Фед) ги задржаа каматните стапки непроменети на петтиот состанок по ред, но невообичаено поделеното гласање покажа дека кај дел од креаторите на монетарната политика расте уверувањето дека се потребни повисоки каматни стапки за да се ограничи повторното забрзување на инфлацијата. Сепак, Федералниот комитет за операции на отворениот пазар со девет гласа „за“ и три „против“ одлучи референтната каматна стапка да остане во распон од 3,5 до 3,75 отсто. 

Иако претседателот Кевин Ворш повтори дека целта останува враќање на инфлацијата на два отсто, тој не сигнализираше непосредно зголемување на каматните стапки. Нови податоци за инфлацијата во САД се очекуваат денеска и би можеле да влијаат врз следните одлуки на централната банка. Истовремено, повторниот раст на цената на нафтата Брент, новите царини и силната побарувачка поттикната од вештачката интелигенција ги засилуваат стравувањата дека инфлацијата би можела да остане покачена подолго од очекувањата. 

 

Добро утро, ви пишува Анита С. Буховски од дигиталната редакција на „Блумберг Адрија“. Во продолжение се петте вести што ги издвоиме за почеток на денот. 

 

Колку е оправдано воведувањето на капитално финансираното пензиско осигурување?

 

Сѐ подолгиот животен век, нискиот наталитет и стареењето на населението веќе со децении го ставаат под силен притисок македонскиот пензиски систем. Моделот заснован на генерациска солидарност, во кој придонесите на вработените ги финансираат пензиите на пензионерите, станува сѐ потешко одржлив во услови кога бројот на пензионери постојано расте, а бројот на активни осигуреници не го следи истото темпо. Дополнителен показател за ваквиот тренд е и растечката зависност на Фондот за пензиско и инвалидско осигурување од државниот буџет.

 

Токму овие демографски и финансиски предизвици беа причината Македонија пред две децении да започне со воведување на повеќестолбен пензиски систем, кој покрај државната пензија воведе и задолжително капитално финансирано осигурување, со цел да обезбеди поголема одржливост на системот и посигурни приходи за идните генерации пензионери. Нашата анализа покажува дека денес, кога населението продолжува да старее, а притисокот врз јавните финансии расте, прашањето не е дали реформата била потребна, туку како таа да се продлабочува за да се одговори на демографските предизвици што допрва доаѓаат.

 

Како да знаете дали портфолиото е премногу ризично? Ова се клучни индикатори кои треба да се следат

 

Инвеститорите ги споредуваат приносите од своите портфолија со индексот S&P 500 секој ден и најчесто заклучуваат дека „лошо поминале“ ако не го надминале. Таквата споредба изгледа логична бидејќи е едноставна, но зад неа се крие една од најголемите заблуди во инвестирањето - приносот се гледа изолирано, додека за ризикот што бил потребен за да се стигне до него се зборува многу поретко.

Инвеститор кој остварил скромен принос со стабилно портфолио не поминал автоматски полошо од некој што заработил многу повеќе на екстремно ризични акции - нивните финансиски цели, хоризонти и способност да издржат загуби може да бидат сосема различни. Затоа не постои универзално „најдобра“ инвестиција, туку постои инвестиција чиј ризик одговара на целите и финансиската состојба на конкретниот инвеститор.

 

Што ќе добиете ако платите 840.000 долари за крстарење?

 

Индустријата за крстарења доживува историски бум. Извештајот на „Круз лајнс интернешнл“ (Cruise Lines International Association - CLIA), објавен во април годинава, покажа дека бројот на патници во 2025 година достигнал рекордни 37,2 милиони, а речиси 90 отсто од нив се изјасниле дека планираат повторно да се вратат.

Истовремено, забрзано расте побарувачката за премиум искуства. Туристичките агенти и советниците за патувања токму луксузното крстарење го издвоиле како сегмент со најголем раст во 2025 година, а тоа го покажуваат и бројките. Според истиот извештај, луксузната флота се зголемила тројно во последните 15 години, од 28 бродови во 2010 година на 98 бродови во категоријата луксузни крстарења во 2025 година. Експанзијата се очекува да продолжи, а прогнозите покажуваат дека до 2029 година околу 1,7 милиони патници ќе изберат луксузно крстарење, што би претставувало околу 4 отсто од вкупно проектираните 42,1 милион патници на глобално ниво.

 

Успехот на шпански инвеститори од школата на Бафет привлекува сè поголемо внимание

 

Во време кога глобалните пазари се опседнати со акциите поврзани со вештачката интелигенција и брзиот раст, во Шпанија сè поголемо внимание привлекува спротивната инвестициска филозофија - „вредносно инвестирање“ (value investing). Во центарот на ова движење е Франциско Гарсија Парамес, еден од најпознатите европски инвеститори, чиј успех создаде цела генерација следбеници и го претвори Мадрид во неочекуван европски центар на овој инвестициски пристап.

Во кариера долга повеќе од четири децении, Парамес стекна речиси легендарен статус меѓу value инвеститорите благодарение на високите приноси што ги остваруваше од година во година. Неговиот водечки фонд „Кобас Интернасионал“ (Cobas Internacional), кој управува со средства вредни 1,2 милијарди евра, во последните пет години бележи просечен годишен принос од 20 отсто. Претходно, додека работеше во инвестициската куќа „Бестинвер“, неговите резултати често беа споредувани со оние на легендарниот Ворен Бафет.

 

„Нетфликс“ плаќа 200 милиони долари за пренос на СП за жени во 2027 година

 

„Нетфликс“ (Netflix Inc.) ќе плати 200 милиони долари за телевизиските права за Светското првенство во фудбал за жени следната година, според лица запознаени со договорот, кои побарале да останат анонимни бидејќи не се овластени јавно да зборуваат за деталите.

Стриминг-сервисот претходно објави дека ги обезбедил правата за пренос на натпреварите во САД и Канада за турнирите во 2027 и 2031 година. Но, финансиските детали досега не беа објавени.

„Нетфликс“ одби да го коментира договорот. Од ФИФА не одговорија веднаш на барањето за коментар. Не е познато колку „Нетфликс“ платил за турнирот во 2031 година. ФИФА се обидува да ја зголеми комерцијалната вредност на своите турнири. Најновиот чекор вклучува план комерцијалните права да бидат префрлени во посебен ентитет, а удели во него да им бидат понудени на инвеститори. Таквиот потег предизвика критики, од политичари до УЕФА, европската фудбалска организација.