.webp){kind=icon}
Деловната активност во приватниот сектор во Саудиска Арабија, која не е поврзана со нафта, порасна со најбрзо темпо во речиси осум години, бидејќи економскиот бум ја зголеми побарувачка.
Новите нарачки се зголемија во февруари најмногу од септември 2014 година, а компаниите се оптимисти за годината што претстои, покажува истражувањето од „Ес енд пи глобал“ (S&P Global) за менаџерите за набавки.
Индексот на менаџерите за набавки во Саудиска Арабија се искачи на 59,8 минатиот месец, од 58,2, колку што беше во јануари, што е највисока вредност од март 2015 година.
Bloomberg Mercury
„Економските услови остануваат поволни во сите деловни активности. И покрај построгите монетарни услови, рамнотежата на побарувачката и понудата изгледаше стабилно и поттикнато од тековните проекти во кралството“, рече во извештајот Наиф Ал-Гајт, кој е главен економист во банката Ријад (Riyad).
Движењето на приватниот сектор, кој не е поврзан со нафта, секторот што претставува мотор за креирање нови работни места за најголемиот светски извозник на сурова нафта, го одразува залетот во економијата.
Кралството досега во голема мера беше имуно на глобалните економски проблеми со високите цени на нафтата, што ја ставаа владата на пат да забележи втора година на буџетски суфицит, а инфлацијата останува придушена.
Ненафтениот раст достигна 6,2 проценти во четвртиот квартал минатата година, што е највисоко ниво од третиот квартал во 2021 година.
Според извештајот, новите проекти, како и зголемениот број потрошувачи и некои од промотивните цени, помогнаа да се зголеми продажбата во февруари. Нарачките за извоз исто така се зголемија со остро и побрзо темпо. Тоа предизвика да се зголеми бројот на работни места со втора најбрза стапка во последните пет години.
Сепак, зголемената побарувачка за инпути доведе до тоа некои продавачи да ги зголемат своите цени, што ја турна инфлацијата на највисоко ниво од ноември. Нејзиниот раст делумно беше поттикнат и од зголемувањето на платите на работниците четврти месец по ред.
„Ја одржуваме нашата прогноза за инфлација нешто под три проценти поради тековните притисоци на трошоците и тековната зголемена побарувачка, за која веруваме дека ќе продолжи на среден рок“, рече Ал-Гајт.
Изгледите за активноста во следните 12 месеци исто така се силни.
„Бизнисите покажаа силен степен на доверба кон идните активности. Тековните подобрени пазарни услови се ветувачки, заедно со позитивните очекувања за закрепнување на економиите во развој“, рече Ал-Гајт.
