.webp){kind=icon}
Инфлацијата во САД минатиот месец покажа знаци на забавување, оставајќи со тоа простор Федералните резерви (ФЕД) наскоро да паузираат со зголемувањето на каматните стапки.
Индексот на потрошувачките цени во април се зголеми за 4,9 проценти во однос на истиот месец претходната година, што претставува прво статистичко читање на инфлацијата под пет проценти во последните две години, покажа денешниот извештај на американското Биро за статистика. Малку залади и таканаречениот базичен индекс на потрошувачки цени, кој не ги зема предвид храната и енергијата.
Издвојуваме пет клучни информации од априлскиот извештај за потрошувачките цени во САД:
- Индексот на потрошувачките цени се зголеми за 4,9 проценти на годишно ниво. Според тоа, инфлацијата во САД во април беше малку поладна од очекуваното, што е добра вест, бидејќи го зајакнува ставот на пазарите дека ФЕД веќе на следниот состанок во јуни ќе паузира со покачувањето на каматните стапки и рестриктивната монетарна политика.
- И вкупниот и основниот инфлаторен показател (без храна и енергија) се зголемија за 0,4 проценти во однос на претходниот месец, како што и се очекуваше. Иако тоа е премногу жешко за ФЕД, чија цел е стапката на инфлација да достигне два отсто, сепак актуелните податоци се многу поумерени од прегреаните стапки од минатата година. Некои економисти предвидуваат дека инфлацијата до крајот на годината ќе биде три отсто или дури и помалку.
- Трошоците за домување, кои се најголемата компонента за услуги и сочинуваат околу една третина од вкупниот индекс на потрошувачки цени, минатиот месец се зголемија за 0,4 проценти, што е најмал раст во повеќе од една година. Паднаа цените за авионските билети, престојот во хотелите и новите автомобили.
- Претседателот на ФЕД, Џером Пауел, беше фокусиран на таканаречената супербазична инфлација на основните цени, која го исклучува и домувањето, бидејќи тој смета дека овој сегмент од индустријата на услуги е погоден од тесниот пазар на трудот. Таму има добри вести, бидејќи тие цени се зголемија само за 0,1 отсто. Пазарите проценуваат само мала можност за покачување на каматните стапки во јуни, иако набљудувачите на ФЕД предупредуваат дека е прерано циклусот на зголемување на стапките да се прогласи за завршен.
- Пазарите го прифатија извештајот позитивно. Акциите ја зголемија својата сила на отворените пазари. Индексот S&P 500 скокна за 0,8 проценти на почетокот на тргувањето по американско време, додека технолошкиот индекс Nasdaq 100 порасна за еден отсто. Приносите на државните обврзници паднаа, а надолу се помести и мерачот на „Блумберг“ за вредноста на доларот.
