Проблемите со долгот на САД се ризик за намалување на кредитниот рејтинг од „Фич“

Тензиите околу преговорите за максималната граница на долгот на САД се зголемија откако „Фич“ (Fitch Ratings) предупреди дека рејтингот ААА на нацијата е под закана од политичкиот ќор-сокак што го спречува договорот.

„'Фич' може да ја намали својата оценка за да ја одрази зголемената пристрасност што го попречува решението и покрај брзото приближувањето на таканаречениот датум 'икс' (X)“, се наведува во соопштението, осврнувајќи се на точката во која Вашингтон останува без готовина. Тоа ги премести САД на „негативен рејтинг“ според нивната класификација.

И пазарите покажуваат зголемена нервоза поради застојот со зголемени премии на државните записи што достасуваат во периодот кога ризикот од неисполнување на обврските е највисок, додека индексот S&P 500 се намалува веќе два дена. Економистите предвидуваат дека неплаќањето на САД може да предизвика рецесија, со распространети загуби на работни места и пораст на трошоците за задолжување.

„Предупредувањето на 'Фич' ја нагласува потребата за брза двопартиска акција од страна на Конгресот за да се подигне или суспендира лимитот на долгот и да се избегне генерирана криза за нашата економија“, рече Лили Адамс, портпаролка на Министерството за финансии.

Движење на вредноста на јапонскиот јен / Bloomberg Mercury

 

Трошоците за осигурување на американскиот државен долг од неисполнување на обврските се зголемија, а изјавата на „Фич“ исто така го насочува вниманието на другите рејтинг-агенции за да се види како би можеле да реагираат тие. Портпаролот на Белата куќа рече дека извештајот ја покажува итноста да се постигне брзо решение.

„Најлошото сценарио би било ако пресметката доведе до тоа владата да пропушти исплата на долгот за првпат, што може да резултира со широко или трајно намалување на кредитниот рејтинг. Толку многу средства се проценети во директна врска со американските државни обврзници што турбуленцијата од поизразеното намалување на рејтингот ќе се почувствува на пазарите низ светот“, рече Николај Шмит, главен глобален економист во „Ти роу прајс“ (T. Rowe Price).

Во 2011 година кредитната агенција „Ес енд пи глобал рејтингс“ (S&P Global Ratings) предизвика критики поради намалувањето на рејтингот на САД од AAA по слично конфронтирање со можност за неисполнување на обврските.

Стратезите на „ЏП Морган Чејс“ (JPMorgan Chase & Co) и на „Морган Стенли“ (Morgan Stanley) предупредија дека ќор-сокакот ги загрозува изгледите за пазарите на акции, додека трговците исто така се натрупаа со свопови и опции за главните валути за да ги заштитат своите портфолија.

Јенот, кој важи за традиционално валутно прибежиште, се зголеми по реакцијата на трговците на веста. Сепак, не е невообичаено Конгресот да склучува договори во последен момент, кога притисокот станува доволно голем за да ги принуди преговарачите да направат болни избори.

„Веруваме дека се зголемија ризиците дека лимитот на долгот нема да биде подигнат или суспендиран пред датумот 'икс' и, следствено, дека владата може да почне да пропушта исплата на некои од своите обврски. Приоритизирањето на должничките хартии од вредност пред другите достасани плаќања по икс-датумот ќе избегне неисполнување на обврските“, напоменуваат од „Фич“.

Но компанијата соопшти дека очекува решение. Меѓутоа, неуспех што би довел до неисполнување на долгот, сепак, би го навел „Фич“ да ги намали оценките за засегнатите должнички хартии од вредност до значајно понизок рејтинг.

Претседателот на Претставничкиот дом, Кевин Мекарти, вчера изрази оптимизам дека преговарачите на Белата куќа и републиканците ќе постигнат договор навреме за да се избегне потенцијалното катастрофално неплаќање. Коментарите на републиканецот од Калифорнија дојдоа по четиричасовната средба меѓу неговите и избраните преговарачи на претседателот Џо Бајден, поттикнувајќи оптимизам дека Конгресот ќе дејствува пред 1 јуни, датумот до кој министерката за финансии Џенет Јелен ги предупреди САД дека може да останат без пари на сметките за плаќање.

Вилијам Фостер од „Мудис инвесторс“ (Moody's Investors Service), кој инаку е висок кредитен службеник, во интервју минатата недела рече дека ги слуша вистинските работи од Вашингтон, а неговата компанија го задржала највисокиот рејтинг на САД непроменет и покрај незгодните преговори. Агенцијата „Ес енд пи“ (S&P) ја задржа стабилната перспектива за рејтингот за време на најновите расправии, очекувајќи дека ќе се постигне договор.

„Предупредувањето на 'Фич' е секако многу симболично и на некој начин може да го принуди 'Мудис' да го следи примерот. Тоа исто така ќе стави поголема контрола врз доларот и државните обврзници како засолништа“, рече Вишну Варатан, раководител за економија и стратегија во „Мизухо“ (Mizuho Bank Ltd) во Сингапур.

Во моментов нема коментари за веста. Биди прв да коментира...

Остави коментар