.webp){kind=icon}
Сè понестабилната светска клима сега е еден од клучните ризици за управување кога станува збор за долгорочни инвестиции во земјоделството.
„Поминавме многу време размислувајќи за моделите на врнежи, сценаријата за климатски промени“, рече Адријан Гонан, директор за земјоделски инвестиции во „Варакирри асет“ (Warakirri Asset Management), на годишната конференција ЈАНА (JANA) во Сиднеј во четвртокот. Компанијата има повеќе од 3 милијарди австралиски долари (1,9 милијарда долари) под управување и има инвестирано во земјоделски култури, млечни производи и хортикултура низ Австралија.
Екстремните горештини и обилните дождови ги оштетија посевите низ светот оваа година, од пченката и сојата во Америка до пченицата во Кина. Делови од јужна Австралија забележаа намалување на врнежите во последните децении, при што климата во земјата се затоплува во просек за 1,47 Целзиусов степен од почетокот на евиденцијата во 1910 година.
Bloomberg
Зголемените глобални температури се закануваат да ги оштетат посевите што се потпираат на предвидливото време, што веројатно ќе доведе до повисоки цени на храната. Тоа го зголемува ризикот владите да го ограничат извозот за да обезбедат безбедност на храната за своите граѓани.
„Ако можеме да инвестираме во бизниси каде што можеме да ја минимизираме нашата изложеност на климата, што навистина влијае на приносот или продуктивноста, тоа е местото каде што би сакале да се вклучиме“, рече Френк Бариларо од „РОС партнерс“ (ROC Partners), кој има околу осум милијарди долари под управување, за време на интервјуто на конференцијата.
Глобалниот шеф на „Нувен нечрал капитал“ (Nuveen Natural Capital), Мартин Дејвис, рече дека има многу повеќе можности да се додаде вредност со повеќегодишните култури, како што е грозјето, и дека технологијата е важен дел од процесот на селекција на средства.
„Тоа значи користење модели за предвидување на климата за да се разгледаат одредени локации каде што ќе има зголемен ризик во иднина и да се одлучи да не се инвестира во тие специфични области“, рече тој.
„Нувен нечрал капитал“ има над 12 милијарди долари средства под управување, вклучувајќи повеќе од три милиони хектари на речиси 600 имоти во десет земји, според неговата веб-страница.
