Фед ја задржа референтната каматна стапка на исто ниво

Членовите на Федералниот комитет за отворен пазар во САД денеска едногласно  донесоа одлука да не се менува референтната каматна стапка односно да остане во досегашниот опсег од 5,25-5,5 проценти, што е највисоко ниво во последните две децении. Ова е шестиот состанок по ред на кој членовите на комитетот ја носат истата одлука.

„Во последниве месеци, нема понатамошен напредок кон целта на комитетот за инфлација од два проценти“, пишува во изјавата по денешниот состанок.

Всушност, станува збор за повторување на ставот на комитетот дека нема да ги намали стапките „додека не добие поголема доверба дека инфлацијата одржливо се движи кон два проценти“.

Фед најави дека ќе го забави темпото на квантитативно затегнување почнувајќи од 1 јуни со тоа што ќе ја намали границата на износот на државните хартии од вредност кои излегуваат од билансот за повеќе од половина односно од 60 на 25 милијарди долари секој месец.

На прес-конференцијата по денешниот состанок, првиот човек на Фед, Џером Пауел истакна дека „инфлацијата е сè уште превисока“ и дека не е осигурен понатамошен напредок во намалувањето. 

„Ние сме целосно посветени на враќање на инфлацијата на нашата цел од два проценти“, рече Пауел.

Џером Пауел/Фото: Ал Драго/Блумберг

 

Тој додаде дека потрошувачката е стабилна во последните квартали и покрај повисоките каматни стапки, но дека некои деловни инвестиции се погодени. Пауел меѓудругото нагласи дека побарувачката за работна сила сè уште ја надминува понудата на достапни работници. 

Потврдени прогнозите на аналитичарите на „Блумберг Адрија“

Аналитичарите на „Блумберг Адрија“ вчера прогнозираа дека нема да има промена на референтната каматна стапка на Фед. Според нив, силниот пазар на трудот и изменетите очекувања на аналитичарите дека намалувањето на каматните стапки ќе почне есенва во моментов се посилни од сигналот за забавување на растот на БДП и личната потрошувачка во првиот квартал.

„Инфлацијата во третиот месец изнесува 3,5 проценти, што е мало зголемување во однос на вториот месец, кога изнесувала 3,2 проценти. Зголемувањето на инфлацијата доаѓа од континуираниот раст на цената за изнајмување куќи/станови, која во американската кошничка на стоки сочинува дури 36 проценти од потрошувачката“, објаснија аналитичарите.

Тие додадоа дека исто така медицинските услуги и материјали, како и осигурувањето автомобили, продолжија да растат, зголемувајќи ја вкупната стапка на инфлација.

„Силниот раст на цените и купувањето автомобили сега може да се забележи во растот на цените на осигурувањето на автомобилите, додека, од друга страна, медицинските услуги се врзани за долгорочни договори и дури сега се гледа прелевањето на вкупната стапка на инфлација, така што тие може да се сметаат за ’задоцнети’ показатели“, наведуваат нашите аналитичари.

Што се однесува на пазарот на трудот, тие бележат намалување на побарувањата по основ на невработеност според последното читање, а стапката на невработеност е на ниво од 3,8 проценти.

„Ова ниво на невработеност можеме да го сметаме за природно, со оглед на тоа што вкупниот број на вработени е на историски рекордни нивоа. Бројот на работници што работат на повеќе работни места е на ниво на годините пред пандемијата, 5,2 проценти од вкупната вработеност, што е нешто пониско од рекордните максимални вредности од 1990-тите“, објаснија аналитичарите.

Тие посочија дека пазарот на обврзници сè уште предвидува некаква форма на рецесија во САД.

„Додуша, распонот меѓу двегодишните и десетгодишните обврзници се намали и во моментов изнесува -30 базични поени, што е најниско во последната година, со оглед на тоа што, според економските податоци, САД се далеку од рецесија“, велат аналитичарите.

Очекувања

Тие очекуваат Фед да продолжи да ја одржува реториката на одлучување „водено од податоци“, но и да внимава на пазарите на капиталот.

„Пазарите значително ги изменија очекувањата во однос на растот на економијата, а почетокот на намалувањето го гледаат дури во деветтиот месец од годинава. САД во моментов се задолжуваат за 10 години со 4,7 проценти, што е највисоко од 2007 година и врши огромен притисок врз каматните трошоци на буџетот, кои се 1 трилион американски долари“, велат аналитичарите.

Од нашиот аналитички тим очекуваат дека инфлацијата ќе флуктуира нагоре и надолу, но со тенденција на опаѓање, имајќи предвид дека „задоцнетите“ сегменти на инфлацијата треба постепено да издишат.

„Во комбинација со мало забавување на личната потрошувачка и растот на БДП, ние сме нешто пооптимисти за почетокот на намалувањето на каматните стапки (во седмиот месец годинава), но сепак веруваме дека одлуките ќе се носат на месечна основа без Фед да ја објави насоката за почеток на намалувањето на каматните стапки, па можно е тој да се одложи за наесен“, велат аналитичарите.

Во моментов нема коментари за веста. Биди прв да коментира...

Остави коментар