.webp){kind=icon}
Гувернерот на Банката на Јапонија (БоЈ) Казуо Уеда јасно ги предупреди финансиските пазари дека е можна промена во монетарната политика. Еден ден по средбата со премиерот на Јапонија, Фумио Кишида, Уеда ја заостри реториката во однос на јенот, кој ослабе во однос на другите светски валути.
„Девизните курсеви значително влијаат на економијата и инфлацијата“, изјави Уеда во парламентот во средата. „Во зависност од овие случувања, може да бидат неопходни нови промени во монетарната политика“, додаде тој.
Уеда, исто така, рече дека е важно да се запамети дека послабиот јен сега е поверојатно да ја поттикне инфлацијата бидејќи компаниите се поподготвени да ги пренесат ценовните притисоци на потрошувачите.
Јенот дополнително ослабе на 155,27 јени во однос на доларот веднаш по неговите коментари, па се чини дека властите може да бидат принудени да дејствуваат порано од очекуваното.
Bloomberg
Промената на начинот на кој Уеда зборува за слабеење на јенот очигледно е последица на минатомесечните движења на курсот по неговите „млаки“ коментари. Во еден момент, еден долар купуваше повеќе од 160 јени, што е невидено во последните 34 години.
Уеда даде слични коментари претходно оваа недела, а пазарите сега шпекулираат за можни промени во монетарната политика на следните состаноци на централната банка.
Пред законодавниот дом зборуваше и јапонскиот министер за финансии Шуничи Сузуки, кој рече дека „послабиот јен има добри и лоши страни, но сега преовладуваат негативните аспекти кои се манифестираат преку притисокот на увозните цени“.
Сузуки додаде дека решавањето на проблемот со инфлацијата е „исклучително важно“ за официјалните лица.„Бидејќи Јапонија зависи од прекуокеанските пазари за храна и енергија, а повеќето трансакции се одвиваат во долари, послабиот јен може да ги зголеми цените на увезените стоки“, рече тој.
Бидејќи реакцијата за евентуалните минатонеделни интервенции во голема мера изостана, некои аналитичари наведуваат дека сега на ред е БоЈ да направи чекор. Иако во март ги зголеми каматните стапки за прв пат од 2007 година, секое наредно зголемување на каматните стапки може да биде проблематично поради слабиот економски раст.
„Банката на Јапонија внимателно го следи слабеењето на јенот во своите одлуки“, рече Уеда.
