САД ќе продолжат да ги „затвораат вентилите“ за гасот од Русија

САД ќе продолжат да ги „затвораат вентилите“ за рускиот извоз на течен природен гас за да ја лишат Москва од финансиски средства што ги користи за нејзината војна во Украина, изјави висок функционер за енергетика на Стејт департментот.

„Нашата цел со Русија е едноставна: тоа е да ги намалиме приходите што ги ужива од нејзините ресурси на нафта и гас“, рече Џефри Пјат, помошник-секретар за енергетски ресурси и поранешен американски амбасадор во Украина, во интервју за телевизијата „Блумберг“.

САД минатата година ја санкционираа новата руска фабрика за извоз „Арктик ЛНГ 2“ (Arctic LNG 2), а потоа почнаа да воведуваат ограничувања за бродовите што од август годинава почнаа да земаат гориво од централата. Досега ниту еден танкер што го носи гасот не се закотви на странско пристаниште поради стравувањата од американска одмазда, што е редок успех за Вашингтон во спречувањето на рускиот извоз на стоки.

Сепак, САД не ги санкционираат другите руски фабрики за течен природен гас, вклучувајќи ги „Јамал“ (Yamal) и „Портоваја“ (Portovaya), кои продолжуваат да испорачуваат пратки во Европа и во Азија. Мерките против овие капацитети веројатно би ја заостриле глобалната понуда на течен природен гас и би ги зголемиле цените.

„Нашата политика функционира. Не можам да шпекулирам за идни санкции, но она што можам да ви кажам е дека ние посветуваме многу, многу големо внимание на тоа каде се движат санкционираните руски товарни бродови и можете да бидете уверени дека администрацијата на Бајден ќе продолжи да ги ’затвора вентилите’ против рускиот извоз на течен природен гас“, рече Пјат.