Седум прашања за шефот на Фед: Државни резерви во биткоини нема да има!

Американската централна банка (Фед) по третпат годинава ги намали каматните стапки, овој пат за четвртина процентен поен, со што се намалени за цел процентен поен од највисокото ниво. Истовремено, тие изјавија дека ќе бидат исклучително внимателни при донесувањето на идните одлуки, особено поради упорната инфлација, и истакнаа дека во 2025 година би можеле да видиме две намалувања.

По објавувањето на одлуката на Фед, новинарите го преплавија претседателот Џером Пауел со прашања. Избравме неколку од нив, заедно со одговорите на Пауел.

Пред некое време рецесијата се предвидуваше како неизбежна. Дали сте задоволни со тоа како завршува 2024 година?

Мислам дека е многу јасно дека избегнавме рецесија. Годинашниот раст беше солиден. Индикаторот за приватна домашна конечна потрошувачка, за кој сметаме дека најдобро го прикажува приватното побарување, годинава се очекува да биде околу три проценти. Тоа е навистина добра бројка, американската економија е извонредна. На многу меѓународни состаноци на кои присуствувам се зборува за тоа колку добро им оди на САД. Ако погледнете низ светот, многу земји се борат со забавен раст и водат постојана борба со инфлацијата. Позицијата и успешноста на американската економија ми изгледаат добро и сакаме да продолжиме така.

Фед предвидува повисока инфлација следната година, домаќинствата сè уште силно ги чувствуваат високите цени. Дали инфлацијата е поупорна отколку што очекувавте?

Таа е малку поупорна. Но, ако се вратиме две или три години наназад, многу луѓе рекоа дека ако сакаме да ја намалиме на овие нивоа, треба да бидеме во длабока рецесија со висока невработеност. Но не е така. Состојбата е многу подобра отколку што многумина очекуваа. Инфлацијата се намали од 5,6 на 2,8 проценти за една година, што е доста добро.

Луѓето денес го чувствуваат ефектот на високите цени, не на високата инфлација. Разбираме дека работите значително поскапеа и дека луѓето ги чувствуваат поскапувањата на храната, транспортот, трошоците за греење и слично, но сето тоа се случуваше глобално, во сите развиени економии.

Самата инфлација сега е значително пониска, но луѓето сè уште го чувствуваат ефектот на високите цени. Инфлацијата треба да се врати на целното ниво и да се задржи таму, за што се залагаме сега. Значи, платите и надоместоците треба да растат побрзо од инфлацијата од година на година, тоа ќе им го врати на луѓето доброто чувство за економијата. Мора да го направиме тоа и целиме на тоа.

Постигнувањето на целта за инфлација од два процентa првично го предвидовте за 2026 година, а сега го поместивте за 2027 година. Дали оваа цел може да се помести уште подалеку во иднината, дали е можно да не се постигне?

Има многу неизвесности при предвидувањето на идните бројки. Но, во право сте. Има напредок, но е побавен отколку што се надевавме.

Нема да бидеме задоволни со ваквите бројки, туку ќе инсистираме на постигнување инфлација на ниво од два процентa. Сигурен сум дека ќе успееме.

Како ќе се одразат тарифите на инфлацијата?

Сè уште не знаеме на што ќе бидат и од кои земји, колку долго и колкави ќе бидат. Не знаеме дали ќе се воведат реципрочни тарифи. Така што не знаеме како ќе се одрази сето тоа на цените за потрошувачите.

Кои ќе бидат најголемите предизвици во економијата за идната администрација?

Денешната состојба на економијата е добра, многу сум оптимистичен, добро се чувствувам и за нашата политика. Очекуваме следната година да биде уште една добра година.

Дали можете да исклучите зголемување на каматните стапки следната година?

Во денешниот свет не можеме ништо да исклучиме, но изгледа дека тоа не е веројатно сценарио. На 4,3 проценти сме, што сè уште е рестриктивна но добро калибрирана стапка за да напредуваме со инфлацијата, а истовремено да го одржуваме силниот пазар на трудот.

Дали гледате некаква корист во тоа американската влада да има резерви во биткоини?

Знаете дека не смееме да поседуваме биткоини. Правилата се јасни за тоа што можеме да поседуваме. Фед не гледа во насока на промена на законот. За тоа треба да размисли Конгресот.

Во моментов нема коментари за веста. Биди прв да коментира...

Остави коментар