Панел на најмоќните централни банкари во светот: Ќе паѓаат ли каматите и понатаму?

Претседателката на Европската централна банка (ЕЦБ), Кристин Лагард, денеска беше домаќинка на шефот на американските Федерални резерви, Џером Пауел, и на гувернерите на централните банки од В. Британија, Јапонија и Ј. Кореја на панел-дискусијата  -на централните банкари во рамките на форумот во Синтра, Португалија. Тие дискутираа за монетарните политики во услови на изразена глобална геополитичка и економска несигурност. Годинашната дискусија се проследува со особено внимание, со оглед на тоа што многу држави се борат да ја стават инфлацијата под контрола и да продуцираат економски раст во вакво турбулентно опкружување.

Лагард објави дека јунската инфлација во еврозоната се смирила на два процента, а тоа всушност е и целта на ЕЦБ.

„За понатаму, постојат два вида на ризици – од сѐ поголемата фрагментација на светот и загрижувачкиот геополитички развој на настаните“, истакна Лагард.

Таа ја повтори својата мантра: ЕЦБ се потпира исклучиво на квалитетни податоци и одлучува околу каматите од состанок до состанок, а не според некоја претходно одредена патека за каматните стапки, така што не би давала некои индиции околу следните чекори. ЕЦБ ги намалуваше каматните стапки осум пати годинава и Лагард рече дека „се приближуваат кон крајот на циклусот на кратење на стапките“. 

Фед продолжува со внимателниот пристап за каматите 

Пауел од Фед додаде дека и тој исто така е комотен со позицијата во која е американската централна банка во моментов. „Американската економија е во доста добра состојба, инфлацијата се спушти блиску до два отсто. Генерално, здрави сме“.

Тој потсети уште еднаш дека ефектите од царинската политика на Трамп сѐ уште не се појавиле преку инфлацијата и дека тој и тимот во Фед очекуваат тоа да се случи летово. „Сметаме дека одговорно нешто сега е да почекаме и да видиме како ќе се одвиваат работите“.

Пауел рече дека мнозинството од 19-те члена на бордот на Фед очекува дека е прикладно каматите да се намалат подоцна годинава. Тоа ќе зависи од податоците што допрва ќе пристигаат, кои Фед ги анализираат внимателно.

Bloomberg

 

Прашан за тоа дали намалување на стапката се очекува веќе на јулскиот состанок на бордот, тој не одговори одредено. „Ниту еден состанок не би го исклучил или зел предвид сега“, одговори Пауел. Интересно е тоа што, како што коментираат аналитичарите, Пауел не ја исклучува сосема можноста за јулско кратење на стапките. Од една страна, тоа не е ни премногу изненадувачки, со оглед на тоа што од Фед истакнаа дека тоа сосема зависи од економските податоци, но од друга страна е малку чудно затоа што повеќето нивни претставници сигнализираа дека јули е веројатно премногу рано за тој потег.
Сепак, Пауел призна дека Фед досега ќе ги намалеше стапките да не беа царините.

Што ги движи инфлациите во В. Британија и во Јапонија? 

Гувернерот на Банката на Англија, централната банка на Обединетото Кралство, Ендрју Бејли, го повтори својот став дека секундарните ефекти се малку веројатни во неговата земја. Поголем дел од растот на индексите на потрошувачките цени доаѓа од административните цени, а пазарот на работна сила се опушта, објасни тој. „Сметам дека каматните стапки и понатаму ќе одат надолу“.

На другата страна на светот, во Јапонија, гувернерот на тамошната централна банка Казуо Уеда рече дека инфлацијата е водена од три клучни фактори: движењето на платите, очекуваните негативни ефекти од трговските царини и домашниот шок во снабдувањето со храна. Земајќи ги предвид овие фактори, тој очекува инфлацијата да се намали кон два процента следната година или во следните две години. 

Односот евро - долар 

Што се однесува на односот евро – долар, Лагард рече дека нема да коментира за девизниот курс на еврото, кој значително се зголеми во однос на доларот. „Тој ги одразува пазарните услови и состојбата на нашата економија, а може да се должи и на слабоста на доларот и на силата на еврото“, додаде таа.

Според Лагард, 2025-та би можела да биде пресвртна година за глобалниот статус на доларот.

Bloomberg

 

Рии Чанг-јонг, гувернер на Корејската централна банка, вели дека многу се зборува за тоа, дека многу луѓе зборуваат за тоа, „но тие сè уште ги чуваат средствата во долари, а наедно го зголемуваат коефициентот на обезбедување“.

Неговиот јапонски колега Уеда додаде дека сè зависи од тоа што ќе направат Кина и Европа за да ги подобрат ефикасноста и практичноста на нивните валути. 

Аплаузи за Пауел 

На панелот, исто така се спомна новиот пакет на фискални закони во САД за кои се очекува значително да го зголемат дефицитот. Додека другите не коментираа за американските јавни финансии, Пауел рече дека и тој не сака многу да коментира за тоа, но дека американскиот пат не е одржлив и, порано или подоцна, ќе мора да се реши таа ситуација. Инаку, тој доби аплауз од присутните поради неговото спротивставување на упорните барања за кратење на каматите, од страна на Трамп, и издржувањето на политичкиот притисок што го трпи од американскиот претседател.

 

 

 

Во моментов нема коментари за веста. Биди прв да коментира...

Остави коментар