Саудиска Арабија може да се откаже од Азиските зимски игри, размислуваат за алтернативни домаќини

Саудиска Арабија и Олимпискиот совет на Азија почнале да им се обраќаат на други земји за можноста тие да го преземат домаќинството на Азиските зимски игри во 2029 година, откако ски-центарот предвиден за турнирот во блискоисточната земја се соочува со предизвици во изградбата.

Претставници од Ријад одржале неформални разговори со свои колеги во Кина, брифираат извори, кои побарале да останат анонимни поради доверливоста на информациите. Во меѓувреме Корејскиот спортски и олимписки комитет (KSOC) бил контактиран од Олимпискиот совет на Азија ОСА (OCA) за можноста да биде домаќин на турнирот, навел претставник на комитетот во писмена изјава испратена до „Блумберг“.

Настанот се смета за важен показател на глобалните амбиции на Саудиска Арабија, а кралството би можело на крајот едноставно да реши да ги намали плановите за предвидениот ски-центар, наречен Троџена (Trojena), за да ги исполни роковите, потенцираат изворите. Досега, кралството јавно соопшти дека изградбата во Троџена продолжува според фазната динамика.

Задоцнувањата со роковите за делови од ски-центарот довеле до тоа властите во Ријад уште на почетокот на годината да почнат разговори за можноста за алтернативна локација, велат некои од соговорниците. Троџена е дел од планираниот саудиски мегаград Неом, кој во последните години се соочува со низа предизвици. Според платформата за деловна интелигенција МЕЕД (MEED), проектот Троџена е проценет на 19 милијарди долари. Саудиска Арабија веќе има потрошено десетици милијарди за изградба на гигапроекти, но сега се соочува со пониски цени на нафтата и буџетски дефицити.

Како дел од разгледуваните планови, Саудиска Арабија би можела да ѝ предложи на Кина да биде домаќин на игрите за четири години, а кралството да ја преземе организацијата во 2033 година, посочуваат соговорниците. Кина, според нив, е подготвена да ја поддржи заливската нација според потребите, но се обидува формално да добие потврда дали Саудиска Арабија навистина сака да се откаже од претстојните игри.

„Неом и Локалниот организациски комитет работат во тесна координација со Олимпискиот совет на Азија и Саудискиот олимписки и параолимписки комитет“, изјави портпарол на Неом, упатувајќи ги дополнителните прашања до ОСА, која не одговори на барањата за коментар.

Корејскиот спортски и олимписки комитет го информирал своето владино раководство и сè уште нема донесено одлука, изјави претставник на агенцијата. Нејасно е дали ОСА веќе се обратила и до Кина, а конечниот исход останува неизвесен.

Конечната одлука ќе ѝ ја оставиме на ОСА, која е организатор, изјави упатениот соговорник. „Кина ја поддржува Саудиска Арабија во домаќинството на ова издание на Азиските зимски игри. Не сме запознаени со развојот што го спомнувате“, соопшти кинеското Министерство за надворешни работи.

Последните Азиски зимски игри се одржаа во Харбин, Кина, во февруари годинава. Харбин е наречен Леден Град поради обилните снежни врнежи и зимските температури што достигнуваат до -15 Целзиусови степени, нешто што е тешко да се спореди со пустинската земја.

ОСА е свесна за ризикот од одредени доцнења во Троџена, но сè уште е прерано за одлука и организацијата би можела да ја донесе најрано следната година, на почетокот на август, вели добро упатениот извор.

Овие дилеми го откриваат предизвикот со кој се соочува Саудиска Арабија со Неом, најавен во 2017 година и сметан за еден од најголемите градежни проекти во светот. Сега неговата цена се проценува на 1,5 трилион долари, трипати повеќе од првичната вредност. Други делови од Неом, меѓу кои двата облакодера познати како „Линијата“ (The Line) и луксузниот остров Синдалах (Sindalah), исто така се соочиле со доцнења.

Bloomberg

Троџена се гради во пустина со малку природен снег, а Саудиска Арабија се соочи со низа предизвици, меѓу кои доведување вода до планините, создавање езеро и производство на доволно вештачки снег. Дополнителен притисок врз кралството претставува фактот што за меѓународни спортски натпревари често е потребно инфраструктурата да биде готова многу пред почетокот.

Со текот на годините, Троџена беше истакнувана како инженерско и архитектонско чудо. Во соопштение од јуни 2023 година, Неом за плановите за регионот прикажа слика од огромно езеро меѓу планинските врвови.

Саудиските власти и Неом досега не дале индикација дека ски-центарот заостанува или е во ризик да не ги исполни роковите. Сепак, познато е дека земјите-домаќини често се тркаат со времето за да бидат подготвени за глобални спортски настани.

Во пресрет на Олимписките игри во 2016 година, Рио де Жанеиро во последен момент се обидуваше да ги заврши спортските објекти, хотелите и сместувањето. Игрите на Комонвелтот во 2010 година во Њу Делхи беа погодени од доцнења во изградбата и објекти под стандард. Пореално, една непрофитна организација предупреди дека патната инфраструктура во САД не е подготвена за низа меганастани што земјата ќе ги организира. Но способноста на Саудиска Арабија да го реализира зимскиот турнир е под будно око, бидејќи државата вети дека ќе биде домаќин на низа меѓународни спортски настани во вакви комплекси, меѓу кои и Светското првенство во фудбал за мажи во 2034 година.

Азиските зимски игри се сметаат за влијателни, обично со учество на олимписко ниво на спортисти од Кина, Јапонија, Јужна Кореја, Индија и други земји. Претходните изданија привлекуваа десетици илјади навивачи за спортови како хокеј на мраз, брзо лизгање и сноубординг, покрај скијањето.