„Амазон“ и „Мета“ се меѓу компаниите кои сакаат тројно зголемување на нуклеарните капацитети

Големите технолошки и енергетски компании ветија дека ќе поддржат поголема употреба на нуклеарна енергија, бидејќи растечката побарувачка од центрите за податоци и фабриките го надминува сегашниот капацитет.

„Амазон“, „Мета“, „Аксидентал петролеум“ (OXY) и „Дау“ се меѓу првите членови на групата големи корисници на енергија (Large Energy Users)  кои ги поддржаа глобалните напори за тројно зголемување на нуклеарниот капацитет на светот до 2050 година.

Технолошките компании и индустриските потрошувачи бараат нуклеарна енергија за да ги задоволат системите и фабриките гладни за енергија, а владите ширум светот исто така покажуваат обновен интерес за нуклеарната енергија поради нејзините пониски емисии. Сепак, има мал расположлив капацитет од постојните реактори, а планирани се само неколку нови електрани. Стимулацијата на приватниот сектор може да го поттикне развојот, иако последната иницијатива не вклучува никакви конкретни финансиски обврски.

„Инвестирањето и проширувањето на пристапот до чиста, сигурна, конкурентна нуклеарна енергија е од клучно значење за индустрискиот напредок“, рече во изјавата Едвард Стоунс, потпретседател за енергија и клима на „Дау“.

Некои од учесниците на групата веќе работат со нуклеарни компании. „Амазон“ и „Дау“ потпишаа договори со „Икс енерџи“, иако производителот на реактори нема да има развиен комерцијален систем до крајот на деценијата.

Ветувањето на конзорциумот беше поддржано од Светската нуклеарна асоцијација, која објави дека поддршката од некои од најголемите светски компании ја одразува растечката свест дека нуклеарната енергија може да игра клучна улога во транзицијата од фосилните горива.

„Невидената поддршка што сега ја објавија некои од највлијателните компании во светот за тројно зголемување на глобалниот нуклеарен капацитет до 2050 година, испраќа јасен сигнал за забрзување на политичките, финансиските и регулаторните промени“, рече Сама Билбао и Леон, генерален директор на Светската нуклеарна асоцијација.