Инвеститорите пренасочуваат милијарди во фондови поврзани со вода

Обемот на средствата на фондовите чии инвестиции се насочени кон вода достигна рекордно ниво бидејќи финансиската индустрија реагира на изгледите за хроничен недостиг на вода во наредните години.

Инвеститорите имаа 94 милијарди долари во фондови поврзани со вода минатата година, што е повеќе од 60 отсто во однос на 2020 година, според новиот извештај на „Блумберг интелиџенс“ (Bloomberg Intelligence-BI). Бројот на вакви фондови се зголемил за 184 во 2024 година, што е исто така рекорд, според БИ.

Средствата на фондовите растат паралелно со свеста дека на планетата ѝ снемува вода потребна за практично функционирање на сè, од земјоделство, до ладење центри за податоци, до основна потрошувачка на луѓето. Се предвидува дека побарувачката за питка вода ќе ја надмине понудата за 40 отсто до крајот на оваа деценија, посочуваат аналитичарите на БИ.

Долгорочни последици

„Големи делови од индустријата работат во области со таканаречен висок воден стрес, што може да доведе до одложување на одобрувањата на проектите, прекини во производството и повисоки трошоци“, пишуваат аналитичарите на БИ.

Само во секторот на недвижности, 60 отсто од глобалните фондови до 2030 година би можеле да работат во области со недостиг на вода, додаваат тие, а до 2050 година, 70 трилиони американски долари од глобалниот бруто домашен производ би можеле да бидат изложени на висок воден стрес, што е петкратно зголемување од 2010 година, покажуваат податоците на Светскиот институт за ресурси.

Компаниите фокусирани на решенија за зачувување на водата веројатно ќе профитираат од растот на пазарот/УНИЦЕФ

Малку индустрии ќе бидат поштедени од последиците од големиот недостиг на вода што следува, предупредува извештајот на БИ. Земјоделството, текстилната индустрија, прехранбениот сектор, производството на пијалаци, хемиската индустрија и секторот за нафта и гас се „особено изложени на ризик“, се вели во извештајот. Исто така, неколку од најголемите американски банки моментално финансираат „некои од секторите со најголем интензитет и изложеност на ризик“, посочуваат аналитичарите на БИ.

Можности за раст

Во исто време, компаниите фокусирани на решенија за зачувување на водата веројатно ќе го искористат растот на пазарот, смета БИ.

„Растот на продажбата веројатно ќе се забрза за компаниите кои помагаат да се реши проблемот со намалените резерви на вода“, напишаа тие. БИ ги наведува „Веолија“ (Veolia Environnement), „Ксилем“ (Xylem) и „Еколаб“ (Ecolab) како компании кои би можеле да имаат корист. „Само пазарот за десоленизација (одслолување на водата, отстранување на минералите од неа) би можел да порасне до 50 милијарди долари до 2032 година“, велат тие.

Во меѓувреме, пазарите забележуваат пораст на инвестициите во фондови фокусирани на вода. Минатата година, одржливиот долг наменет за проекти поврзани со вода се искачи на речиси 80 милијарди американски долари, од нешто помалку од 1,4 милијарди долари во 2023 година. Ова се случува поради регулаторните рамки што им олеснуваат на инвеститорите да ги оценуваат финансиските производи, како што се упатствата за сино финансирање на Меѓународната финансиска корпорација од 2022 година.

Досега, сепак, приносите од инвестициите фокусирани на вода даваат измешана слика. Во 2024 година, 73 отсто од членовите на индексот за вода на „Блумберг“ постигнаа позитивни приноси, но само 44 отсто беа подобри од поширокиот глобален пазар. Високата изложеност на ризик поврзан со вода е во корелација со високите нивоа на нестабилност во односот цена-заработка, заклучи БИ.