text size
Акциите на данскиот енергетски гигант „Орстед“ (Ørsted) нагло пораснаа откако американски судија даде зелено светло за продолжување на работите на „Револушн винд“ (Revolution Wind), голема ветерна централа што е веќе 80 проценти завршена и се наоѓа покрај брегот на Роуд Ајленд. Одлуката беше донесена само еден ден откако компанијата предупреди дека застојот може да предизвика „непоправлива штета“ на проект вреден околу пет милијарди долари.
Проектот, кој треба да снабдува околу 350 илјади домаќинства во Роуд Ајленд и Конектикат со 704 мегавати електрична енергија, беше блокиран од 22 август, кога администрацијата на американскиот претседател Доналд Трамп издаде наредба за запирање на работите, повикувајќи се на националната безбедност. Но, сојузниот судија Ројс С. Ламберт пресуди дека таа одлука е „врв на самоволие и произволно однесување“, нагласувајќи дека владата не понудила никакви фактички причини зошто изградбата треба да запре.
Силен поттик по судската одлука
За „Орстед“, кој моментално се обидува финансиски да зајакне преку собирање 9,5 милијарди долари од акционери, судската одлука претставува значително олеснување. Тие во својот проспект неодамна предупредија дека доцнењето ги чини дури 25 милиони долари неделно, а стотици работници се присилно ставени на пауза.
Проектот, вреден околу 5 милијарди долари, е околу 80 проценти завршен
Bloomberg
„Нема сомнеж дека тужителите би претрпеле непоправлива штета“, изјави судијата Ламберт.
Реакцијата на инвеститорите беше брза и акциите на „Орстед“ во Копенхаген во вторникот на отворањето на берзата скокнаа дури за 12 проценти, а до крајот на денот го задржаа растот од околу 6,4 проценти. За компанијата, која од почетокот на годината изгуби околу 35 проценти од пазарната вредност, тоа е најзначаен раст во последните месеци.
Акциите на „Орстед“ скокнаа откако судијата дозволи продолжување на изградбата
Bloomberg
Гувернерот на Конектикат, Нед Ламонт, ја нарече пресудата „добра вест за потрошувачите“, нагласувајќи дека со завршување на проектот се очекува заштеда од околу 500 милиони долари годишно за домаќинствата.
„Ако сакате да разговараме за птици, риби или национална безбедност – може. Но, во меѓувреме, да се вратиме на работа“, рече тој.
Поддршка од локалните власти и продолжување на политичката борба
Поддршка стигна и од Роуд Ајленд, каде што државниот јавен обвинител Питер Нерона нагласи дека претседателот „не може да укинува проекти за чиста енергија само затоа што тоа политички му одговара“. И Роуд Ајленд и Конектикат поднесоа и посебни тужби против сојузната влада, со цел да го забрзаат завршувањето на проектот.
Администрацијата на Трамп, која од почетокот на својот мандат во јануари започна офанзива против офшор ветерните централи, не остана без одговор. Портпаролот на Белата куќа соопшти дека судската одлука „нема да биде последниот збор во овој случај“. Сојузното биро за управување со океанска енергија (Bureau of Ocean Energy Management) најави дека продолжува со истрагата за можни ризици за националната безбедност и други активности на континенталниот гребен.
Ветерниот парк „Револушн винд“ треба да снабдува околу 350 илјади домаќинства
Bloomberg
„Револушн винд“ е само еден од неколкуте големи ветерни паркови по должината на атлантскиот брег на САД на кои североисточните сојузни држави се потпираат за премин кон почисти извори на енергија. Додека овие проекти имаа силна поддршка за време на администрацијата на Џо Бајден, Трамп со години е еден од најгласните критичари на ветерните централи и веќе започна постапки за повлекување на клучните дозволи и за други проекти.
Сепак, за „Орстед“, пресудата е клучен знак дека „Револушн винд“ може да избегне понатамошни скапи доцнења и да го отвори патот за завршување во планираниот рок – и покрај политичките контроверзии што и понатаму го следат проектот.
.webp){kind=icon}
