Стартап собра 450 милиони долари за комерцијализација на единствената докажана технологија за фузија

Стартапот за фузиска енергија „Инертиа Ентерпрајзес“ (Inertia Enterprises) собра 450 милиони долари за да започне со развој на електрана базирана на изградба на најмоќните ласери во светот.

Рундата на финансирање од Серија А ја водеше „Бесемер“ (Bessemer Venture Partners), со учество на „Тришолд“ (Threshold Ventures), „Лонг Џурни“ (Long Journey Ventures) и ГВ (GV - порано позната како Google Ventures). Компанијата со седиште во Ливермор, Калифорнија, очекува да започне со изградба на комерцијална електрана во 2030 година. Планот е да се изгради специјална фабрика за производство на ласери, како и производствена линија што ќе испорачува милиони ситни пелети направени од специјални материјали, кои тие имаат намера да ги „пукаат“ со ласери за да стимулираат реакции на фузија.

Износот на инвестицијата покажува колку расте интересот за фузијата. Тоа е технологија што ветува изобилство на чиста енергија, но во исто време носи исклучително тешки инженерски и физички предизвици. Според извештајот на Здружението на индустријата за фузија објавен во јули, секторот привлече повеќе од 9,7 милијарди долари инвестиции до средината на минатата година.

Големите зделки продолжија оттогаш, особено рундата од 863 милиони долари објавена во август од страна на „Комонвелт Фужн Системс“ (Commonwealth Fusion Systems). Десетици компании ја развиваат технологијата, која се обидува да ги имитира условите во центарот на ѕвездите, но досега ниту една не демонстрирала комерцијално одржлив систем.

 

Постојат два главни пристапи за развој на електрани со фузија. „Комонвелт Фужн Системс“е меѓу лидерите во развојот на технологија што користи моќни магнети за контрола на екстремно топла плазма. „Инертиа“ се одлучи за поинаков пат, потпирајќи се на моќни ласери за да ги поттикне реакциите на фузија. Овој пристап за прв пат беше потврден во 2022 година, во научен пробив во Националната лабораторија „Лоренс Ливермор“.

Во тој тест, беше користен најголемиот ласер во светот, кој погоди капсула со големина на зрно пипер. Ова предизвика реакција на фузија на два изотопи на водород, ослободувајќи повеќе енергија отколку што беше потребно за да се започне реакцијата. „Инертиа“ сега развива нов ласер за кој извршниот директор Џеф Лосон рече дека ќе биде милион пати помоќен. Меѓу основачите на компанијата е Ени Кричер, главна дизајнерка на експерименти за фузија во „Лоренс Ливермор“. „Инертиа“планира да користи илјада ласери кои би се активирале десет пати во секунда во идна комерцијална електрана.

Повеќето од водечките компании за фузија досега се држат до магнетниот пристап, но ниту една сè уште не покажала реакција што дава повеќе енергија отколку што е инвестирано во нејзиното започнување, што се смета за најважен критериум за успех во индустријата. Токму затоа пристапот на „Инертиа“, како и знаењето што компанијата го има во рамките на сопствениот тим, претставуваат важна предност, според партнерот на „Бесемер“, Бајрон Дитер.

„Повеќето научни ризици сега се значително намалени“, рече тој. „Не се целосно елиминирани, но секако значително намалени“.