Рекордни бонуси на Волстрит - фондот достигна 49,2 милијарди долари во 2025 година

Просечните бонуси на Волстрит минатата година достигнаа рекордно ниво, при што вкупниот фонд за исплати порасна на 49,2 милијарди долари благодарение на силниот раст на профитите и приходите.

Просечниот годишен бонус се зголеми за шест отсто, на 246.900 долари, според проценките на државниот контролор Томас ди Наполи објавени во четвртокот.

Вкупниот фонд е најголем откако се води евиденција од 1987 година, што го одразува закрепнувањето на спојувањата и преземањата поттикнато од поблага регулатива за време на претседателот Доналд Трамп. Ди Наполи посочи и на силната активност во тргувањето и во издавањето хартии од вредност. Овој резултат означува втора последователна година на рекордни бонуси за вработените во секторот за хартии од вредност.

„Волстрит бележеше силни резултати во поголемиот дел од минатата година, и покрај постојаните домашни и меѓународни превирања“, наведе Ди Наполи во соопштението. „Сепак, бележиме побавен раст на вработеноста, а геополитичките конфликти имаат глобални последици што претставуваат значителни ризици за краткорочните и долгорочните изгледи на финансискиот сектор и пошироката економија.“

Банкарите влегоа во 2026 година по исклучително профитабилна 2025, обележана со пораст на бројот на трансакции и рекордни 134 милијарди долари приходи од тргување. Раководителите на компаниите очекуваа продолжување на тој замав, но војната во Иран и геополитичките тензии ги потресоа американските пазари, ја поттикнаа инфлацијата и донесоа понеизвесни изгледи.

Волстрит учествуваше со околу 19 отсто во даночните приходи на сојузната држава Њујорк меѓу 2024 и 2025 година, а Ди Наполи проценува дека бонусите за 2025 ќе донесат дополнителни 199 милиони долари данок на доход за државата и уште 91 милион долари за градот Њујорк во однос на 2024 година.

Bloomberg

Предложениот буџет на гувернерката Кети Хочул се темелеше на претпоставката дека бонусите во поширокиот сектор на финансии и осигурување ќе пораснат за 26 отсто во оваа фискална година, но Ди Наполи предупредува дека даночните приходи од тие исплати би можеле да бидат пониски од очекувањата.

Градоначалникот Зохран Мамдани, кој стапи на функцијата во јануари, водеше кампања насочена кон намалување на трошоците за живот на работничката класа, вклучително и со предлози за зголемување на даноците за корпорациите и богатите, што предизвика незадоволство кај дел од лидерите на Волстрит. Во јуни милијардерот Бил Акман предупреди дека компаниите и богатите жители би можеле масовно да го напуштат градот откако поранешниот гувернер Ендрју Куомо ја призна победата на Мамдани на демократските внатрепартиски избори за градоначалник.

Во новиот извештај, Ди Наполи наведува дека растот на вработеноста во секторот за хартии од вредност е побрз во други делови од земјата, додека бројот на вработени на Волстрит паднал на 198.200, според прелиминарните податоци. Тоа е помалку во однос на триесетгодишниот максимум од 201.500 во 2024 година и најниско ниво во последните три години. Контролорот очекува дека, по годишните ревизии на податоците, бројката сепак ќе биде коригирана нагоре и ќе покаже умерен раст.

Уделот на градот во вкупниот број вработени во овој сектор на ниво на САД падна на 18 отсто во 2024 година, во споредба со околу една третина во 1990 година, но и натаму останува поголем отколку во која било друга сојузна држава, се наведува во извештајот.

И покрај напорите на финансиските компании да ги вратат вработените во канцелариите во Њујорк, некои лидери на Волстрит забележуваат промени во структурата на вработените по локации.

Џејми Дајмон, извршен директор на „ЏП Морган“ (JPMorgan Chase & Co.), во вторникот изјави дека банката имала околу 35.000 вработени на Менхетен кога тој се приклучил на компанијата пред околу 20 години, додека сега има 26.000. Во меѓувреме, бројот на вработени на компанијата во Тексас пораснал од 11.000 на 33.000.

Дајмон на шега додаде дека изградбата на новото седиште на банката на Менхетен, вредно околу 3 милијарди долари, започнала пред пет години, пред Мамдани да стапи на функцијата. Дел од промените во бројот на вработени во градот може да се припишат на високите даноци на личните приходи, наследството и добивката на компаниите, како и на „антибизнис“ расположението, наведе тој.