„Рајнметал“ (Rheinmetall) се подготвува за првото издавање јавна обврзница по речиси 16 години, во момент кога европската одбранбена индустрија бележи силен раст.
Најголемиот германски производител на оружје разговара со инвеститори за издавање на петгодишни senior unsecured обврзници во вредност од 500 милиони евра, изјави извор запознаен со процесот кој сакал да остане анонимен. Последен пат компанијата издаде класична обврзница во 2010 година, иако во меѓувреме собираше капитал преку конвертибилен долг и Schuldschein заеми, покажуваат податоците собрани од „Блумберг“.
Портпаролот на „Рајнметал“ не одговори веднаш на барањето за коментар.
Приходите на „Рајнметал“ силно пораснаа по руската инвазија на Украина во февруари 2022 година, додека Германија и другите европски земји ја зголемија воената потрошувачка. НАТО притоа од европските производители на оружје бара поголеми инвестиции и засилување на производството, особено во сегментите на противвоздушна одбрана и ракети со долг дострел.
По врвот достигнат во септември минатата година, акциите на компанијата значително паднаа по неколку разочарувачки деловни резултати, што дополнително го отвори прашањето дали вреднувањата во секторот отишле предалеку во однос на реалната заработка на компаниите. Дел од инвеститорите веќе не сакаат да ја зголемуваат изложеноста на традиционалните производители на оружје, бидејќи ја доведуваат во прашање потребата од скапи оклопни возила, со оглед на сè поважната улога на дроновите и други нови технологии на боиштата во Украина и на Блискиот Исток.
Глобални координатори на издавањето се „Кредит агрикол“ (Crédit Agricole CIB) и „Уникредит“ (UniCredit), додека улога на заеднички bookrunner имаат „Комерцбанк“ (Commerzbank), „Кредит агрикол“, „Дојче банк“ (Deutsche Bank), „Сосиете женерал“ (Société Générale) и „Уникредит“.
Агенцијата „Мудис“ (Moody’s) се очекува потенцијалното издание на обврзници да го оцени со рејтинг Baa1.
.webp){kind=icon}
