S&P 500 со најдолга серија неделни добивки од 2023 година: Преглед на пазарите

Надежите за договор меѓу САД и Иран што би го претворил кревкиот прекин на огнот во траен мир го поттикнаа оптимизмот на Волстрит, туркајќи ги акциите кон нивната најдолга серија неделни добивки од 2023 година.

По растот од околу 18 отсто од најниските нивоа предизвикани од војната, S&P 500 забележа осма последователна недела на добивки. Приносите на двегодишните американски обврзници достигнаа највисоко ниво од февруари 2025 година, откако гувернерот на Федералните резерви Кристофер Волер порача дека следниот потег со каматните стапки подеднакво може да биде и зголемување и намалување. Пазарите на пари целосно вградија во цените едно зголемување на каматите годинава. Во нестабилна сесија, американската нафта се спушти под 97 долари.

Bloomberg

Речиси три месеци по почетокот на конфликтот, Иран ја разгледува најновата понуда доставена од САД. Началникот на пакистанската армија, кој важи за главен посредник меѓу Вашингтон и Техеран, пристигна во иранската престолнина. Американскиот државен секретар Марко Рубио изјави дека има „мал напредок“ во преговорите.

Иран не е блиску до договор со САД, а средбата со началникот на пакистанската армија не треба да се толкува како знак дека договорот е близу, објави „Исламска Република Њуз Агенси“, повикувајќи се на портпаролот на иранското Министерство за надворешни работи Исмаил Багаеи. Фокусот е ставен на запирање на војната, рече тој.

Самото тоа што акциите пораснаа пред продолжениот тридневен викенд во САД кажува многу за односот на трговците кон ризикот, вели Стив Сосник од „Интерактив брокерс“ (Interactive Brokers).

„Во поизразено избегнување на ризик, би очекувале трговците да го намалуваат ризикот и да ги затвораат позициите“, рече тој. „Наместо тоа, тие се подготвени да додаваат долги позиции, што укажува дека не сакаат да ризикуваат да пропуштат раст поттикнат од мировен договор.“

Акциите со најдолга неделна серија раст од 2023 година

Bloomberg

САД и Иран се во ќорсокак откако во април се согласија на прекин на огнот, додека трговците внимателно ги анализираат економските последици од конфликтот. Довербата на американските потрошувачи во мај падна на рекордно ниско ниво, а долгорочните инфлациски очекувања значително се влошија поради војната.

Волер изјави дека неговиот сегашен став е да се задржат каматните стапки на сегашното ниво додека не стане појасно влијанието од војната, но предупреди дека не ја исклучува можноста за идно зголемување на каматите ако инфлацијата наскоро не почне да забавува.

„Последните изјави на Волер го потврдуваат поостриот тон на Федералните резерви“, изјави Кришна Гуха од „Еверкор“(Evercore). „Сепак, неговиот став за монетарната политика не беше толку остар колку што звучеше реториката, бидејќи Волер рече дека засега е подготвен да почека и да ја следи ситуацијата.“

Претседателот Доналд Трамп нагласи дека сака Кевин Ворш независно да раководи со Федералните резерви, обидувајќи се да ги намали стравувањата кај инвеститорите дека би можел да врши притисок врз новиот гувернер на централната банка околу одлуките за монетарната политика. Ворш положи заклетва во петокот.

Корпорациски вести:

„Антропик“ (Anthropic PBC) е на пат да ја затвори најновата рунда финансирање, која би можела да надмине 30 милијарди долари при проценета вредност поголема од 900 милијарди долари, веќе следната недела, според лица запознаени со процесот, со што би ја престигнала „Опен еј-ај“ (OpenAI) и би станала највредниот стартап за вештачка интелигенција во светот.

„Воркдеј“ (Workday Inc.), производител на софтвер за управување со работни процеси, објави подобри резултати од очекуваните во првиот квартал, што помогна да се намалат стравувањата дека компанијата би можела да биде погодена од развојот на вештачката интелигенција.

„Зум“ (Zoom Communications Inc.) прогнозираше посилен раст на продажбата од очекуваното и соопшти дека клиентите плаќаат за проширениот пакет канцелариски производи.

„Леново“ (Lenovo Group Ltd.) пријави силен раст на приходите поврзани со вештачката интелигенција, што ги ублажи тешкотиите од растечките цени на компонентите.

„Убер“ (Uber Technologies Inc.) разгледува можности за целосно преземање на „Деливери хиро“ (Delivery Hero SE), изјавија лица запознаени со разговорите, потег што би ѝ помогнал подобро да се натпреварува со „Дор Деш“ (DoorDash Inc.) надвор од САД.