„Спејс екс“ дополнително го збогати саудискиот принц Алвалид

Скокот на цената на акциите на „Спејс екс“ на дебито во петокот ја зајакнува среќата на еден од најбогатите луѓе во Саудиска Арабија.

Инвестициската компанија на принцот Алвалид бин Талал, „Киндом холдинг“ (Kingdom Holding Co.), порасна на отворањето во неделата откако растот на акциите на „Спејс екс“ на првиот ден од тргувањето ја зголеми вредноста на уделот на саудиската фирма на речиси 7 милијарди долари, или приближно половина од нејзината пазарна капитализација.

„Киндом холдинг“ соопшти дека поседува 42,4 милиони акции во „Спејс екс“, вредни 6,8 милијарди долари врз основа на цената на затворањето на компанијата. Акциите на „Киндом“ пораснаа до 5 отсто, со што компанијата беше вреднувана на 56 милијарди ријали (14,9 милијарди долари).

„Спејс екс“ почна со тргување во петокот по прибирањето 75 милијарди долари во најголемата јавна понуда досега. Акцијата затвори со раст од 19 отсто на 160,95 долари, носејќи десетици милијарди долари добивка за мал број фирми.

„Фаундерс донд“ (Founders Fund), компанија предводена од долгогодишниот соработник на Маск, Питер Тил, поседува околу 3 отсто удел, додека „Андрисен Хоровиц“ ќе оствари најголем поврат во својата историја, објави „Блумберг њуз“. „Секбоја капитал“, која првпат инвестираше во „Спејс екс“ на крајот од 2019 година, поседува околу 1,5 отсто од компанијата.

Овој месец, „Киндом холдинг“  објави дека нивниот удел претставува 0,34 отсто од „Спејс екс“, додека личната изложеност на принцот Алвалид изнесува околу 0,29 отсто во ракетната и сателитска компанија на Илон Маск. Уделите ја зголемија нето-вредноста на Алвалид на нешто над 27 милијарди долари, највисоко во последната деценија, според индексот на милијардери на „Блумберг“.

Саудискиот милијардер првпат застана на страната на Маск во 2022 година кога коосновачот на „Тесла“ го купи Tвитер - сега преименуван во X - за 44 милијарди долари, префрлувајќи го својот капитал заедно со инвеститори како Лари Елисон и „Андрисен Хоровиц“.

Листирањето на „Спејс екс“ ќе им донесе корист и на други инвеститори во Саудиска Арабија, вклучително и на државниот Фонд за јавни инвестиции вреден 1 билион долари, кој поседува удел во фирмата на Алвалид, како и на земјата во целина, која ја направи вештачката интелигенција централна точка во напорите за диверзификација на економијата,надвор од енергетиката.

„Хјумеин“ (Humain), компанија за вештачка интелигенција поддржана од Фондот за јавни инвестиции, инвестираше 3 милијарди долари во „Екс АИ“ (xAI) на Маск оваа година како дел од финансирање вредно 20 милијарди долари. Тој договор му даде на „Хјумеин“ значителен малцински удел во „Екс АИ“, со акции кои, како што беше кажано тогаш, ќе се конвертираат во акции на „Спејс екс“.

И на други места, регионалните инвеститори градат позиции низ екосистемот на вештачка интелигенција. „Ем-џи-екс“ од Абу Даби има удели во „Антропик“, „Опен-еј-ај“ и „Екс АИ“ - инвестициски „хет-трик“ - што му дава изложеност на три од најнабљудуваните компании за вештачка интелигенција. Катар следи слична стратегија, инвестирајќи и во „Антропик“ и во „Екс АИ“.

Иако напорите за вештачка интелигенција често се гледа како понов феномен, некои инвеститори од Заливот со години вложуваат во трансформативни технологии. ИХЦ (IHC) од Абу Даби инвестираше во „Спејс екс“ во 2020 година, додека „Абар“ (Aabar) има удел во „Вирџин галактик“ (Virgin Galactic) на Ричард Бренсон во 2009 година, години пред вселената и вештачката интелигенција да станат опсесија на пазарот.