Централниот депозитар за хартии од вредност ја менува тарифата за услугите

Централниот депозитар за хартии од вредност АД Скопје (ЦДХВ) донесе измени на тарифата за услугите што ги врши за учесниците во работата на депозитарот и корисниците на неговите услуги.

„Станува збор за први посеопфатни измени на тарифниот модел по подолг временски период, со кои се врши усогласување на одделни тарифни ставки и се воведуваат одредени новини во начинот на тарифирање на депозитарските услуги“, соопштија од ЦДХВ.

Оттаму објаснуваат дека измените на тарифата предвидуваат умерено усогласување на одредени надоместоци со економските движења и растот на трошоците во изминатиот период.

„Истовремено, се воведува и нов надоместок за централно чување на хартии од вредност (safekeeping fee), кој претставува стандардна практика кај голем број европски депозитари и старателски институции“, наведуваат од ЦДХВ.

 

Со цел да им се овозможи на учесниците на пазарот соодветен период за подготовка и приспособување, надоместокот за централно чување на хартии од вредност ќе започне да се применува од 1 јануари 2027 година.

„Надоместокот ќе се пресметува врз основа на вредноста на портфолиото и ќе се однесува исклучиво на иматели на хартии од вредност со портфолија над милион евра. Според анализите на ЦДХВ, со овој надоместок ќе бидат опфатени приближно еден процент од вкупниот број иматели на хартии од вредност“, информираат од ЦХДВ.

Од депозитарот велат дека предложените стапки се поставени на конзервативно ниво во однос на стапките што се применуваат во повеќе земји од регионот.

„Дополнително, со воведувањето на новиот модел на финансирање, од 1 јануари 2027 година ќе престане да се применува една од постојните тарифни ставки што се наплатува од издавачите на хартии од вредност, со што се воспоставува порамномерна распределба на трошоците за одржување на депозитарската инфраструктура помеѓу различните категории корисници на услугите на ЦДХВ“, соопштија од депозитарот.

Оттаму додаваат дека со овие измени ЦДХВ обезбедува поодржлив модел за финансирање на депозитарската инфраструктура и нејзино понатамошно усогласување со практиките што се применуваат кај современите депозитари.