Преглед на пазарите: Пад на технолошките акции, производителите на чипови претрпеа големи загуби

Акциите паднаа, испраќајќи ги технолошките показатели на најлошиот ден од откривањето на американските тарифи во април минатата година, бидејќи инвеститорите се откажаа од технолошките акции, продлабочувајќи ја распродажбата кај производителите на чипови по нивниот жесток раст оваа година.

Јапонскиот индекс Nikkei 225 падна за дури 6,2 проценти, а тајванскиот индекс Taiex се лизна за 6,5 проценти, оставајќи ги двата референтни индекси на пат кон нивниот најлош ден од 7 април 2025 година. Тоа го насочи показателот за акциите на MSCI во Азиско-пацифичкиот регион кон пад од 2,9 проценти, упатувајќи се кон најниското затворање за повеќе од два месеци. Фјучерсите на индексот на акции укажуваа на понатамошни загуби.

Прозводителите на чипови паднаа низ целиот регион, при што акциите на „Тајван семикондактор мануфактуринг ко.“ (ТСМЦ) се распродадоа иако нивните приходи ги надминаа очекувањата, додека јапонската „Киоксиа холдингс корп.“ потона за дури 16 проценти.

„Нетфликс инк.“ исто така влијаеше на расположението, при што акциите паднаа за 9 проценти во продолженото тргување откако компанијата предвиде втор квартал по ред со забавување на растот на продажбата. Фјучерс договорите за индексот Nasdaq 100 паднаа за 1,6 проценти, додека европските акции се очекуваше да паднат повеќе од еден процент на отворањето.

На други места, нафтата Брент го поништи претходниот раст и падна за 0,5 проценти. Стоката сè уште е во пораст од 10 проценти за оваа недела, на пат кон својот најголем неделен раст од април и повторно ги разгорува загриженостите за инфлацијата.

Технолошките акции се под притисок во последните недели, бидејќи инвеститорите сè повеќе се прашуваат дали овогодинешниот раст предизвикан од вештачката интелигенција се одвивал предалеку, пребрзо. Додека послабата инфлација во САД ги намали очекувањата за непосредно зголемување на каматните стапки од страна на Федералните резерви, а тензиите на Блискиот Исток продолжуваат да ги движат цените на нафтата, фокусот останува на заработката од вештачката интелигенција како доказ дека милијарди долари потрошени пари ќе се претворат во приноси.

„Насоките за капиталните трошоци повторно доаѓаат во фокусот, бидејќи инвеститорите стануваат сè поскептични во врска со тоа дали растот може да се постигне одржливо, а воедно да се одржи здрав биланс на состојба“, рече Фабиен Јип, пазарен аналитичар во „ИГ Интернешнл“ (IG International). „Очекуваме пазарот да продолжи да доживува нестабилност во текот на сезоната на заработка, но ова веројатно нема да биде крај на приказната за вештачката интелигенција.“

Во другите делови од пазарот, државните обврзници паднаа во Австралија и Јапонија. Државните обврзници на САД малку се променија, при што приносот на референтната 10-годишна обврзница се задржа на 4,55 проценти.

Јенот се тргуваше по околу 162,45 за долар, дури и кога јапонскиот министер за финансии, Сацуки Катајама, го повтори предупредувањето за можна интервенција на пазарот, бидејќи валутата продолжи да се движи близу до најниското ниво во последните четири децении.

Златото беше на пат кон најголемата неделна загуба од почетокот на јуни, бидејќи обновените непријателства на Блискиот Исток и зголемувањето на цените на нафтата ги поттикнаа шпекулациите дека Федералните резерви може да ги одржат каматните стапки повисоки подолго време.

Доларот беше малку посилен во однос на повеќето од неговите главни конкуренти. Тоа се должеше на комбинацијата од распродажбата на технолошките акции, зголемувањето на цените на енергијата и повисоките реални приноси во САД, рече Чиду Нарајанан, главен стратег за Азиско-пацифичкиот регион во „Велс Фарго“ (Wells Fargo) во Сингапур.

„Податоците од САД не се ‚жешки‘, но се доволно силни за да го поддржат доларот дури и кога другите фактори се наклонети кон маргинална сила на доларот“, рече тој.

 

Вниманието остана цврсто на полупроводничкиот сектор, бидејќи инвеститорите се прашуваа дали технолошките акции станале премногу богато вреднувани. „Алфабет“ потона за 4,4 проценти во четврток по информациите дека „Гугл“ доцни со месеци во испораката на својот водечки модел на вештачка интелигенција.

Трговците се борат со тоа дали повеќе од 725 милијарди долари што се очекува да ги потрошат четирите најголеми американски оператори на вештачка интелигенција оваа година ќе се претворат во принос.

Индексот на полупроводници во Филаделфија падна за околу 19 проценти од врвот во јуни. Проценката на азиските производители на полупроводници се упати кон својот најголем неделен пад од почетокот на март.

„Без сомнение, ова е месец на извонредна нестабилност во областа на производителите на чипови“, изјави Џорџ Бубурас, раководител на истражувањето во хеџ фондот „К2 Асет Менаџмент“ (K2 Asset Management) на Блумберг ТВ. „Не сме биле преоптоварени во областа на чипови од почетокот на годината. И затоа очигледно не сме преоптоварени во оваа моментална нестабилност. Но, оваа ротација што се случува е доста извонредна.“

Корпоративни вести:

• „Спејс екс“ (SpaceX) соопшти дека ќе се стреми повторно да ја лансира својата ракета „Старшип“ за неколку дена откако ја прекина мисијата во четврток кога некои од неговите мотори не се запалија, што ги намали акциите.

• Заработката на „Волво кар“ (Volvo Car AB) за вториот квартал беше послаба од очекуваната, бидејќи интензивната конкуренција, повисоките трошоци и издатоци поврзани со зголемувањето на производството на нов целосно електричен СУВ влијаеја на профитабилноста.

• Шведскиот заемодавател „Сведбанк“ (Swedbank AB) објави профит од кредитирање во вториот квартал што не ги исполни очекувањата на аналитичарите, под притисок од пониските маржи на хипотеки во Шведска и повисоките трошоци за позајмување.

• „Данске банк“ (Danske Bank) ја зголеми својата прогноза за нето приход за целата година.

 

Некои од главните движења на пазарите:

Акции

• Фјучерсите на S&P 500 паднаа за 0,9 проценти од 7:08 часот наутро по лондонско време

• Фјучерсите на Nasdaq 100 паднаа за 1,7 проценти

• Фјучерсите на Dow Jones Industrial Average паднаа за 0,7 проценти

• Индексот MSCI Asia Pacific падна за 2,9 проценти

• Индексот MSCI Emerging Markets падна за 2,6 проценти

Валути

• Bloomberg Dollar Spot Index малку се промени

• Еврото малку се промени на 1,1441 долари

• Јапонскиот јен малку се промени на 162,42 за долар

• Офшор јуанот малку се промени на 6,7766 за долар

• Британската фунта падна за 0,1 проценти на 1,3461 долари

Криптовалути

• Биткоин падна за 1,9 проценти на 62.858,5 долари

• Етер падна за 2,4 проценти на 1.825,96 долари

Обврзници

• Приносот на 10-годишните државни обврзници на САД се намалија за два базични поени на 4,54 проценти

• Приносот на 10-годишните германски обврзници се зголеми за еден базичен поен на 3,13 проценти

• Приносот на 10-годишните британски обврзници се зголеми за три базични поени на 4,97 проценти

Стоки

• Суровата нафта Брент падна за 0,5 проценти на 83,82 долари за барел

• Спотот златото се зголеми за 0,3 проценти на 3.989,13 долари за унца

 

Оваа сторија е изработена со помош на „Блумберг Аутомејшн“ (Bloomberg Automation).

— Со помош од Вини Хсу, Момока Јокојама, Метју Бургес и Абхишек Вишнои