Берзански преглед: Пад на обврзниците и акциите, раст на нафтата поради тензиите со Иран

Обврзниците и акциите паднаа откако претседателот Доналд Трамп го отфрли најновиот предлог на Иран за повторно отворање на Ормускиот Теснец, намалувајќи дел од оптимизмот што ги поттикна пазарите кон крајот на минатата недела. Нафтата поскапува, а благородните метали се најдоа под продажен притисок.

Приносот на двегодишните американски државни обврзници, кој е чувствителен на каматните стапки, се зголеми за шест базични поени на 4,91 отсто, бидејќи високите трошоци за енергија продолжија да го зголемуваат притисокот врз Федералните резерви да ги зголемат каматните стапки за да се борат против инфлацијата. Приносот на десетгодишните обврзници порасна за пет базични поени, поништувајќи го петочниот пад, предизвикан од очекувањата дека американските и иранските преговарачи разгледуваат договор што би овозможил повторно отворање на клучниот воден пат.

Нафтата брент е поскапа за 3 отсто, чини 107,50 долари за барел, откако Иран соопшти дека нема да ги ублажи своите барања и остана на предлогот за повторно отворање на Ормускиот Теснец. Доларот зајакна во однос на повеќето главни валути. Златото падна за 2,4 отсто на околу 4.180 долари за унца, а среброто се повлече за 4 отсто, бидејќи изгледите за повисоки каматни стапки на централните банки извршија притисок врз металите што не носат принос.

Индексот на азиско-пацифичките акции на MSCI се намали за 0,8 отсто, при што показателот на акциите од континентална Кина го допре најниското ниво во една година. Фјучерсите на индексот S&P 500 паднаа за 0,4 отсто, додека во Европа се очекуваше млако отворање на пазарите.

Bloomberg

Нафтата останува клучен двигател на пазарите, бидејќи високите трошоци за енергија ги поттикнуваат инфлациските притисоци и очекувањата за дополнителни зголемувања на каматните стапки. Просечниот принос на глобалните обврзници минатата недела се искачи над 4 отсто за првпат од 2007 година, зголемувајќи ја загриженоста дека повисоките трошоци за задолжување може да влијаат врз економијата и заработките на компаниите. Пазарите во петокот добија одредено олеснување поради надежите дека разговорите меѓу САД и Иран ќе ги намалат тензиите и ќе го обноват протокот на енергенти низ Ормускиот Теснец.

„Инвеститорите уште еднаш беа разочарани од недостигот на дипломатски напредок“, изјави Раџив Де Мело, виш менаџер на макро портфолио во „Гама асет менаџмент“. „Надежите дека овие разговори ќе помогнат во деескалацијата на конфликтот на Блискиот Исток и ќе го отворат патот за повторно отворање на Ормускиот Теснец беа уништени.“

Условите што ги бара Иран се нешто на што Вашингтон можеби би се согласил пред околу една година, изјави Трамп за „Аксиос“ во интервју во неделата. Американскиот претседател рече дека очекува преговорите да продолжат оваа недела, иако го отфрли најновиот предлог на Иран, објави „Аксиос“.

Тензиите на Блискиот Исток ги зголемија цените на нафтата за околу 75 отсто оваа година.

Фунтата се стабилизираше додека британската полиција истражуваше можен терористички инцидент откако петмина мажи беа уапсени во близина на воздухопловна база користена во американските напади врз Иран.

Државните обврзници во Јапонија, Австралија и Нов Зеланд паднаа заедно со американските државни обврзници. Приносот на тригодишните обврзници на Јужна Кореја се искачи на највисокото ниво во речиси четири години.

Застојот на Блискиот Исток „веројатно ќе остане во фокусот на пазарот“ сè додека подоцна оваа недела не бидат објавени показателите на Федералните резерви за инфлацијата и извештајот за вработеноста во САД, изјави Прашант Њунаха, виш стратег за каматни стапки во азиско-пацифичкиот регион во „Ти ди секјуритис“ во Сингапур.

Трговците целосно вградуваат во цените уште најмалку едно зголемување на каматната стапка на Фед за 25 базични поени до крајот на годината, откако централната банка овој месец ги зголеми трошоците за задолжување за првпат од 2023 година. Министерот за финансии Скот Бесент зазеде поумерен став, велејќи дека креаторите на политиките треба да имаат „отворен ум“ во однос на каматните стапки, бидејќи растот на продуктивноста поттикнат од вештачката интелигенција и дерегулацијата може да помогне во ограничувањето на инфлацијата.

„Сè додека трае конфликтот со Иран, пазарите ќе се соочуваат со изгледи за повисока инфлација, зголемување на каматните стапки и построги финансиски услови“, изјави Веј-Серн Линг, извршен директор во„Јунион“. „Но, инвеститорите треба да внимаваат на можностите за купување со подолгорочна перспектива, имајќи ги предвид намалените вреднувања, поддржани од силниот раст на заработките поттикнат од вештачката интелигенција.“