Берзански преглед: Акциите паѓаат, цените на нафтата и стравот од инфлација растат

Глобалните берзи забележаа пад, додека цената на нафтата брент се приближи до 100 долари за барел, зајакнувајќи ги очекувањата дека централните банки ќе мора дополнително да ги зголемат каматните стапки за да ја задржат инфлацијата под контрола. Во меѓувреме, јапонскиот јен ги избриша добивките кои во еден момент достигнаа и до 1отсто.

Фјучерсите на индексот S&P 500 укажуваа на отворање на американскиот пазар со пад од 0,4 отсто на почетокот на скратената трговска недела поради празник. Пад беше забележан и на европските и азиските берзи. Референтната цена на суровата нафта брент надмина 98 долари за барел откако Саудиска Арабија соопшти дека работењето на некои капацитети во јужниот дел на земјата е прекинато по напади. Дополнителен притисок врз цените создадоа и силните кинески набавки, кои ја намалија понудата на пазарот.

Американските државни обврзници ослабеа пред аукцијата на тригодишни обврзници во вредност од 58 милијарди долари. Доларот остана стабилен. Јенот прво зајакна под нивото од 153 јени за долар, поттикнат од очекувањата за построга монетарна политика на Банката на Јапонија, но подоцна делумно ги намали добивките.

Стравувањата од ескалација на конфликтите на Блискиот Исток ги обликуваат движењата на пазарите во пресрет на објавувањето на податоците за инфлацијата во САД во петок, кои би можеле да бидат пресудни за одлуката на Федералните резерви дали да ги зголемат каматните стапки или да ги задржат непроменети овој месец. Пазарите веќе во голема мера имаат вградено очекувања за септемвриски зголемувања на каматите од страна на Европската централна банка и Банката на Јапонија.

„Веројатно влегуваме во период на прилагодување, бидејќи сме сведоци на значајна промена во глобалната политика на централните банки“, изјави Анастасија Аморосо од „Партнерс груп“ за ТВ „Блумберг“. „Можно е дел од неодамнешните добивки да се избришат или пазарите да влезат во фаза на консолидација.“

Bloomberg

Растот на цените на бакарот дополнително ги засили инфлациските притисоци од суровините. Металот достигна рекордно високо ниво втор ден по ред, поттикнат од ограничената понуда на краток рок и очекувањата дека САД би можеле да воведат царини за увоз на преработен бакар.

Продажбата на тригодишни американски обврзници во вторник ја отвора интензивната недела на задолжување на американската влада. Во текот на неделата ќе следуваат и аукции на десетгодишни и триесетгодишни обврзници, во услови кога приносите на долгорочниот долг се движат близу највисоките нивоа во последните години. Велика Британија, пак, неодамна се задолжи по највисока цена од најмалку 1998 година.

Според Мохит Кумар од „Џефрис“, големата изложеност на инвеститорите кон обврзници сугерира дека наскоро може да дојде до краткорочно намалување на приносите. Потенцијален поттик за тоа би можеле да бидат податоците за инфлацијата во петок или одлуката на Федералните резерви следната недела.

„Доколку податоците за индексот на потрошувачките цени се покажат поволни, што е нашето основно сценарио, би можело да дојде до затворање на постојните позиции, што ќе предизвика раст на цените на обврзниците и пад на приносите“, рече Кумар. „Секое намалување на приносите веројатно ќе им даде поддршка на поризичните средства.“

Во ден во кој производителите на чипови беа меѓу ретките добитници на берзите, Вилем Селс од „Ејч-ес-би-си“ (HSBC) оцени дека вреднувањето на американските акции сè уште не го одразува целосно ефектот што вештачката интелигенција би можела да го има врз продуктивноста и корпоративните добивки. Според него, инвеститорите сè уште со резерва гледаат на проекциите за раст на заработката на компаниите за производство на чипови и по 2027 година.

„Ако се направи чекор назад, резултатите на некои од најголемите компании поврзани со вештачката интелигенција беа навистина силни“, изјави Марк Прескет, виш портфолио-менаџер во „Морнингстар велт“ (Morningstar Wealth). „Сепак, реакцијата на пазарот, со исклучок на ‘Енвидија’, беше прилично воздржана.“