Американските фјучерси растат, азиските ја намалуваат загубата

Доларот ја избриша предноста и фунтата зајакна по извештајот со кој што се зголемија шансите дека британската централна банка (Bank of England-BОE) ќе го продолжи итното купување обврзници. Фјучерсите во САД пораснаа, а азиските берзи ги намалија загубите што ги генерираа во текот на вчерашниот ден поради променливиот интерес за ризик.

Фјучерсите на „S&P 500“ утрово пораснаа за 0,9 отсто, тие на „Nasdaq“ за 1,1 процент, а на „Dow Jones“ за 0,7 отсто.

Фајненшл Тајмс извести дека централната банка им рекла на заемодавателите дека е подготвена да ја продолжи својата итна програма за откуп на обврзници по истекот на крајниот рок, на 14 октомври, со цел да спречи криза во пензискиот фонд во Обединетото Кралство. Тоа беше спротивно на ветувањето од гувернерот Ендру Бејли, кој рече дека ќе го прекине купувањето според планот.

Фунтата ја задржа добивката дури и откако извештајот покажа дека британската економија неочекувано падна во август, зголемувајќи ја можноста земјата да е веќе во рецесија.

Приносите од 10-годишните државни обврзници паднаа по вчера постигнатиот децениски врв, а паднаа и поголемиот дел од европските обврзници.

Олабавувањето на пазарните движења денеска го запре растот на американскиот долар, додека јапонскиот јен остана околу нивото што претходно веќе поттикна владини интервенции. Додека инвеститорите се подготвуваат за зголемување на каматните стапки од страна на американските Федерални резерви (ФЕД), централната банка на Јапонија се држи до ултра лесна монетарна политика.

Bloomberg Mercury

„ФЕД многу ќе обрне внимание на загриженоста околу глобалната финансиска стабилност, затоа што силниот долар е една од причините за тоа, но на крајот сепак клучни двигатели ќе бидат домашните услови и тоа што ФЕД го гледа во инфлацијата“, рече Вероника Кларк, економистка во „Citigroup Inc.“ во разговор за Блумберг ТВ.

Кристина Хупер, главен стратег за светските пазари во „Invesco“, рече дека иако светската економија забавува по зголемувањето на стапките, допрва треба да дојде до значаен пад на инфлацијата. „Ова е извонредно опкружување за заострување на монетарната политика и чекаме да видиме дали нешто ќе се расипе на глобално ниво“, рече таа.

Инаку, цената на златото и нафтата пораснаа. Американскиот претседател Џо Бајден рече дека е можна рецесија, додека рускиот претседател Владимир Путин се закани со уште ракетни напади врз Украина откако претходно го погоди Киев и други градови во најинтензивното војување по првите денови од конфликтот.

Во моментов нема коментари за веста. Биди прв да коментира...

Остави коментар