Американските берзи потонаа по најавите на Пауел

Волстрит во средата заврши во црвено по објавата на ФЕД за уште едно зголемување на каматните стапки од 0,75 процентни поени и најавата на претседателот на централната банка, Џером Пауел, дека немаат намера да застанат тука.

Dow Jones загуби 1,55 отсто, на 32.147 поени, додека S&P 500 потона за 2,50 отсто, на 3.759 поени, а индексот Nasdaq 3,36 отсто, на 10.524 поени, пренесува Хина.

Новото зголемување на каматните стапки беше очекувано, како и пораката од централната банка дека стапката на пораст на цената на парите во иднина може да забави.

Инвеститорите се надеваа дека веќе на седницата во декември ФЕД може да го ублажи зголемувањето на каматните стапки на 0,50 процентни поени, а потоа на почетокот на следната година да ги зголеми уште неколку пати. Благодарение на тоа, веднаш по објавата на ФЕД, цените на акциите пораснаа.

Сепак, пазарот остро падна по прес-конференцијата на претседателот на ФЕД. Пауел, додуша, потврди дека на една од следните седници би можела да започне дискусија за забавување на темпото на зголемување на каматните стапки, но дека сè уште е рано за тоа и дека е потребна решителност и трпение за да се потисне инфлацијата.

„Имаме уште работа, а податоците објавени од нашата претходна седница сугерираат дека конечното ниво на каматни стапки ќе биде повисоко од претходно очекуваното“, рече тој.

Аналитичарите на „Блумберг Адрија“ посочија дека нивната прогноза за највисокото ниво на каматните стапки на ФЕД не е променета и натаму останува во опсег од 5 до 5,25 проценти. „Важна порака за глобалните економски актери, како и за регионот Адрија, е дека капиталот ќе остане ограничен и подготвен за дополнителни зголемувања на трошоците. Ова ќе создаде негативна јамка за земјите од регионо, со оглед на помалата достапност на капитал. Во моментот предвидуваме дека ФЕД повторно би можел да почне да ги намалува каматните стапки во 2024 година, но инфлацијата ќе биде значително пониска дури во 2025 година“, порача нашиот аналитички тим.

Негативниот тренд се пренесе и на европските пазари на капитал, па лондонскиот FTSE индекс ослабе за 0,58 отсто, на 7.144 поени, додека франкфуртскиот DAX се лизна за 0,61 отсто, на 13.256 поени, а парискиот CAC за 0,81 отсто, на 6.276 поени.

Индексот на доларот кој ја покажува вредноста на американската валута во однос на другите шест најважни светски валути се движи околу 111,88 поени, додека вчера во овој момент изнесуваше 111,33 поени.

„Зелената банкнота“ зајакна во однос на европската, па цената на еврото се лизна на 0,9830 долари, додека вчера во овој момент изнесуваше 0,9890 долари.