Азиските индекси се во длабок минус, вредноста на доларот расте

Азиските акции денеска го продолжија падот од вчера, водени од слабоста на финансиските акции бидејќи падот на банката во Силициумската Долина, „Силикон валеј банк“ (SVB / СВБ), продолжи да одекнува низ глобалните пазари.

Показателот за вредноста на азиски акции падна за околу два отсто и ги избриша сите свои добивки за оваа година. Финансиските акции се соочија со најголемо повлекување, бидејќи инвеститорите ги одмеруваат ризиците во секторот. Поради околностите, индексот на банката КБВ (KBW) вчера го забележа својот најголем пад од почетокот на пандемијата на ковид.

Приносот од двегодишните државни обврзници се врати за повеќе од 15 базични поени, но остана значително понизок од нивото на крајот на минатата недела. Тој го забележа најголемото тридневно повлекување од црниот понеделник во октомври 1987 година.

Bloomberg Mercury

 

Мерачот на јачината на доларот се искачи повисоко, откако во понеделникот ги избриша своите годинашни добивки, поради преоценувањето на изгледите за каматните стапки. Трговците со свопови сега сметаат дека шансите се помали од 60 проценти дека Федералните резерви (ФЕД) месецов ќе ги зголемат каматите за уште четвртина процентен поен.

„Грешка во политиката е отфрлањето на најголемиот ризик на пазарот. Тешко е да се контролира инфлацијата, но тешко е и да се одговори на фактот дека има одредена нестабилност во банкарскиот систем“, рече Мери Менинг, глобална раководителка на портфолија за „Алфинити инвестмент“ (Alphinity Investment Management), во гостувањето на телевизијата „Блумберг“.

Економистите на „Голдман Сакс“ (Goldman Sachs Group Inc), како и менаџерите на средства во најголемиот активно управуван фонд за обврзници во светот, „Пацифик инвестмент“ (Pacific Investment Management Co), рекоа дека ФЕД може да земе здив во однос на покачувањето на основната стапка по падот на СВБ. Економистите на „Номура“ (Nomura) отидоа чекор понатаму, велејќи дека ФЕД може да ја намали својата целна стапка следната недела.

Клучни податоци

Трговците го чекаат извештајот за американскиот индекс на потрошувачки цени што треба да биде објавен во текот на денот, со надеж дека ќе добијат јасни знаци за натамошните чекори на ФЕД во однос на монетарната политика.

„Ако оваа објава на индексот на потрошувачки цени во следните часови е во согласност со консензусот или не е полоша од него, тогаш расположението на пазарот може да се смири, но ако добиеме силна бројка, сите облози се отфрлени. Тоа би го ставило ФЕД во навистина тешка позиција, бидејќи податоците би покажале дека каматите треба да се покачат, а ние имаме ризици за финансиската стабилност“, рече Ендрју Тајсхерст, виш економист и стратег за каматни стапки во „Номура Австралија“ (Nomura Australia Ltd), соопшти телевизијата „Блумберг“.

 

 

Индексот S&P 500 утрово падна за 0,2 процента, додека технолошкиот индекс, чувствителен на политиката, Nasdaq 100, се искачи за 0,8 проценти, најмногу за повеќе од една недела. Последиците од колапсот на СВБ го поттикнаа претседателот Џо Бајден да вети посилна регулација на американските заемодавци, истовремено уверувајќи ги штедачите дека нивните пари се безбедни.

Нафтата го продолжи падот пред податоците за инфлацијата, бидејќи најголемиот колапс на американска банка од 2008 година продолжи да бранува низ финансиските пазари, додека азиските енергетски акции паднаа.

Доларот зајакна во однос на еврото и сега овие две валути се тргуваат по курс од 1,0699 долар за евро.

Откако во претходните три сесии златото ја покачи својата вредност за повеќе од пет проценти, утрово и овој благороден метал е во негативната зона, со пад од 0,6 отсто. Со тоа, унцата сега вреди 1.901,80 долар.

Единствена светла точка е криптопазарот, каде што биткоинот порасна за еден отсто и се тргува за 24.487,47 долари, а етерот е во плус за 0,6 проценти и чини 1.681,45 долар.