БЈД собра 5,6 милијарди долари преку продажба на акции во Хонгконг

Кинескиот производител на електрични возила БЈД (BYD Co.) собра 5,6 милијарди долари од најголемата продажба на акции во Хонгконг во речиси четири години.

Компанијата продаде 129,8 милиони акции по цена од нешто над 43 долари секоја, според условите на договорот, потврдувајќи го претходниот извештај на „Блумберг њуз“ (Bloomberg News). Цената е за 7,8 проценти пониска во однос на затворањето на тргувањето во понеделникот во Хонгконг.

Понудата на БЈД, компанија со седиште во Шенжен, се зголеми за 10 отсто од 118 милиони акции што првично ги понуди, покажуваат пресметките на „Блумберг“. Акцијата падна за 7,5 проценти во почетокот на денешното тргување.

Трансакцијата ја означува најголемата продажба на акции во Хонгконг откако фирмата за достава на храна „Мајтуан“ (Meituan) во 2021 година собра 10 милијарди долари преку комбинација на дополнителен пласман и конвертибилни обврзници. Договорот на БЈД исто така ги зајакнува очекувањата меѓу трговците дека продажбата на кинески акции е подготвена за закрепнување по годината на пад.

Продажбата на акциите на БЈД е меѓу најголемите во Хонгконг Bloomberg Mercury

 

Понудата следува по силниот ефект на производителот на автомобили, кој минатиот месец продаде повеќе од 318.000 електрични и хибридни патнички возила, што е пораст од 161 отсто од годишно ниво. Компанијата исто така забележа уште еден рекорден месец за продажба во странство, која достигна 67.025 единици.

Компанијата планира да го искористи свежиот капитал за проширување на својот бизнис во странство, да инвестира во истражување и развој, да го дополни својот капитал за обрт и да троши за општи корпоративни цели, според претходните услови на договорот што „Блумберг“ го доби на увид.

„Ваквиот тип финансирање го гледаме како позитивно“, наведе аналитичарот на „Ситигруп“ (Citigroup Inc.), Џеф Чунг, во соопштение до клиентите. БЈД собира готовина во Хонгконг затоа што пренесувањето кинески јуани во странска валута е скапо, рече Чунг, кој ги анализира акциите на автомобилската индустрија.

БЈД, најпродаваниот автомобилски бренд во Кина, доживува силен раст на своите акции, кои во Хонгконг се зголемија за 46 проценти од нивното најниско ниво во јануари. Тоа е огромна разлика во однос на падот на „Тесла“ (Tesla Inc.) од 29 проценти во истиот период.

Bloomberg Mercury

 

Кинеската компанија сака и да го локализира производството на неколку места низ светот за да ги избегне царините што се наметнуваат за електричните возила од Кина. „Со договорот, БЈД може да ја забрза изградбата на своите фабрики во странство, што доби на итност поради воведените царини“, истакна во своето соопштение аналитичарката на „Блумберг интелиџенс“ (Bloomberg Intelligence) Џоана Чен.

БЈД има цел да ја зголеми вкупната продажба дури на шест милиони возила годинава, ставајќи ја компанијата на исто ниво со тие како „Џенерал моторс“ (General Motors Co). За да ја достигне таа цел, компанијата се шири на пазарите од Југоисточна Азија до Австралија, Јапонија и Латинска Америка, градејќи фабрики и отворајќи дилерски мрежи.

Извршната потпретседателка Стела Ли минатата недела рече дека БЈД сака да изгради трета фабрика во Европа и одлуката за можна локација може да се донесе во следните 18 месеци. Компанијата и дома го засилува производството и гради центар за истражување и развој во Шенжен за да ги интензивира своите идни технолошки инвестиции во електрични возила, откако минатиот месец ја постави како стандард својата напредна технологија за помош на возачот, и тоа во поголемиот дел од своите автомобили, вклучувајќи ги и некои од подостапните модели.