Денот започна неповолно за берзанските индекси

Најголемиот дел акции во Азија се намалија, исто како и фјучерсите на американскиот капитал, бидејќи инвеститорите ги анализираа мешаните корпоративни приходи и најновата процена за американската економија.

Утрово индексите S&P 500 и Nasdaq 100 се стабилни, со незначителна промена на вредноста. Слично е и во Европа, Јапонија и Австралија. Отскокнува хонгконшкиот индекс, кој порасна за 0,2 отсто, како и кинескиот, кој падна за 0,7 отсто. Индексот на азиските берзи низ регионот падна втор ден по ред.

Месечното истражување на Федералните резерви, објавено вчера, покажа дека американската економија „закочи“ со потесен пристап до кредити. Претседателот на ФЕД во Њујорк, Џон Вилијамс, рече дека неодамнешниот тренд на забавување на инфлацијата продолжува, но дека цените остануваат премногу високи. Инвеститорите продолжуваат да се обложуваат во зголемување на каматните стапки следниот месец.

„Инфлацијата нема да исчезне сама по себе. Навистина е прашање дали ФЕД има доволно решителност да ја скрши економијата за да ја намали инфлацијата, а во моментов се чини дека сè уште има“, рече Марија Вејтман, виш стратег за повеќе средства за „Стејт стрит“ (State Street Global Markets), во интервју за телевизијата „Блумберг“.

Падот на американските фјучерси на акции следува по рамниот ден на тргувањето во Њујорк. „Тесла“ (Tesla Inc) не ги исполни очекувањата за профит, додека „Интернешнел бизнис машинс“ (International Business Machines Corp) и „Морган Стенли“ (Morgan Stanley) ги надминаа прогнозите.

„Рецесијата не мора да значи дека компаниите треба да губат пари. Компаниите што имаат многу големи слободни парични текови, кои не мора да одат во банките и да добиваат нови заеми, се тие што обично работат добро“, рече Ерин Гибс, главен инвестициски директор за „Мејн стрит асет“ (Main Street Asset Management), во интервју за телевизијата „Блумберг“.

 

На други места на пазарите, доларот е стабилен, исто како и златото, кое вчера падна под границата од 2.000 долари за унца.

 

На криптопазарот владее негативно расположение, па најголемиот токен, биткоинот, падна за 1,2 отсто, на 28.902,9 долари, додека етерот загуби 1,4 отсто од вредноста и се тргува по цена од 1.953,23 долари.

 

Во моментов нема коментари за веста. Биди прв да коментира...

Остави коментар