Борба со акциите по слабите американски податоци што му штетат на расположението

Европските фјучерси на акции се единствена и осамена светла точка на берзите, бидејќи Азија ги следи загубите на Волстрит откако американските податоци покажаа омекнување на пазарот на трудот.

 

 

Индексот S&P 500 падна за 0,6 отсто, а технолошкиот Nasdaq 100 загуби 0,8 отсто од вредноста. Негативата на азиските берзански индекси се движи во распон од 0,1 отсто во Јапонија до 1,4 отсто во Кина.

Доларот и јенот зајакнаа поради загриженоста од зголемените тензии меѓу Америка и Кина. Зелената валута напредуваше во однос на повеќето свои конкуренти од групата 10 најтргувани валути и е на пат да оствари прва неделна добивка во последните шест недели. Во однос на еврото се тргува по курс од 1,0958 долар за евро.

 

Јенот имаше подобри резултати, бидејќи знаците за влошување на врските меѓу САД и Кина ги поттикнаа трговците да ја купат оваа валута пред викендот. Американскиот претседател Џо Бајден сака да потпише извршна наредба во наредните недели со која ќе се ограничат инвестициите во клучните делови од кинеската економија од страна на американските бизниси, информираа лица запознаени со внатрешните размислувања. Овој потег е уште една мерка во долгогодишната економска кампања против Кина.

„Тоа е само следниот чекор во долгата линија на такви ограничувања што ја зголемува тензијата меѓу САД и Кина, ги зголемува трошоците за трговија и го оддалечува светот од врвната глобализација“, рече Шон Калоу, висок валутен стратег во „Вестпак“ (Westpac Banking Corp) во Сиднеј.

Сепак, капиталните инвеститори во голема мера го отфрлија влијанието на предвидените мерки на Бајден, при што аналитичарите велат дека повеќето се веќе подготвени за раздвојување на двете економии. Акциите на кинеските производители на чипови паднаа утрово, иако трговците рекоа дека повлекувањето дошло по неодамнешниот раст наместо по најновите вести.

„Мислам дека американско-кинеските тензии не се нешто ново на пазарот, но јасно е дека тие ќе продолжат да бидат проблем за инвеститорите на пазарот на акции“, рече Кингер Лау, главен кинески стратег за акции од „Голдман Сакс“ (Goldman Sachs Group Inc) во интервју за ТВ „Блумберг“.

Повторените барања за бенефиции за невработеност во САД скокнаа на највисоко ниво од ноември 2021 година, зголемувајќи ги знаците дека пазарот на трудот почнува да се лади. Продажбата на домови што веќе се во нечија сопственост падна во март за повеќе отколку што прогнозираа економистите, нагласувајќи дека пазарот на недвижности е нестабилен и покрај некои знаци на стабилизирање. Хипотекарните стапки во САД се зголемија за првпат од почетокот на март. Сите тие податоци ги наведоа трговците да ги намалат облозите за повеќе зголемувања на каматните стапки на Федералните резерви (ФЕД).

Претседателката на ФЕД во Кливленд, Лорета Местер, сигнализираше поддршка за уште едно зголемување на каматните стапки за да се смири инфлацијата, истовремено истакнувајќи ја потребата да се следи неодамнешниот стрес на банките што може да го намали кредитирањето и да ја намали економијата. Нејзината колешка од Далас, Лори Логан, рече дека инфлацијата е премногу висока, притоа наведувајќи мерки што треба да се следат.

Златото, пак, загуби 0,5 отсто од својата вредност и падна под границата од 2.000, со што унца чини 1.994,51 долар.

Нема големи промени на криптопазарот. Биткоинот се тргува по цена од 28.194,65 долари, а етерот падна за 0,2 отсто, на 1.933,42 долари.

Во моментов нема коментари за веста. Биди прв да коментира...

Остави коментар