.webp){kind=icon}
Берзата во САД го задржа нагорниот импулс додека трговците се подготвуваат за пауза во една од најагресивните кампањи за затегнување на монетарната политика на Федералните резерви во последните децении.
Технолошките компании ја предводеа добивката во капиталот, при што Nasdaq 100 порасна речиси за 2 отсто, а S&P 500 го надмина внимателно набљудуваното ниво од 4,325. Двата индекса затворија на највисоки нивоа од април 2022 година. „Тесла“ (Tesla Inc.) порасна и на 12-та по ред сесија, што е рекордна серија, а „Епл“ (Apple Inc.) достигна највисоко ниво на сите времиња од 183,79 долари. „Кејкорп“ (KeyCorp) и „Ситизенс“ (Citizens Financial Group Inc.) предводеа со загуби во банките по разочарувачки податоци на конференција за индустријата.
Тим Кук, извршен директор на „Епл“
Bloomberg
Во доцното тргување, „Оркл“ (Oracle Corp.) заработи бидејќи продажбата ги надмина процените, сигнализирајќи дека бизнисот за облак на производителот на софтвер има корист од побарувачката за опрема за развој на вештачка интелигенција.
Двегодишните приноси на државниот трезор, кои се почувствителни на претстојните чекори на централната банка, се пониски. Индексот за доларот на „Блумберг“ беше малку променет. Уште еден пад на нафтата ја намали загриженоста за инфлацијата.
Во пресрет на одлуката на американската централна банка (која се очекува утре), индексот на потрошувачките цени што ќе биде објавен денеска е клучен за расположението на пазарот. „Веројатно извештајот ќе ги поддржи облозите за паузата на ФЕД в среда“, рече Ана Вонг од „Блумберг економикс“.
За Дејвид Кели, главен глобален стратег во „ЏП Морган“ (J.P. Morgan Asset Management), ФЕД на состанокот треба да го одмери напредокот на инфлацијата наспроти ризикот од рецесија.
„Бројките едноставно нема да поддржат натамошно затегнување и ова ќе стане појасно во следните неколку недели“, рече Кели. „Ако е така, инвестициското опкружување би можело да поддржи пониски долгорочни каматни стапки, понизок долар и дополнителни добивки во цените на акциите“.
Федералниот комитет за отворен пазар се очекува да ги задржи стапките на опсег од 5 до 5,25 отсто во јуни - иако официјални лица се соочуваат со дебата за тоа што да прават во јули, според економистите анкетирани од „Блумберг“. Облозите покажуваат дополнително затегнување за речиси четвртина поен на состанокот следниот месец.
„Јастребовско прескокнување“
Според Нил Дута од „Ренесанс макрорисрч“ (Renaissance Macro Research), „јастребовско прескокнување“ само ќе ѝ купи на ФЕД малку време.
Седиштето на ФЕД
Bloomberg Mercury
„Доколку ФЕД одлучи да го прескокне состанокот во јуни, како што очекувам, мислам дека нема друг избор освен да звучи јастребовски настроено со оглед на нејзиното ветување за потези зависни од податоците“, додава Дута.
Изгледите за пауза во зголемувањето на каматните стапки му помогнаа на S&P 500 да влезе на биковскиот пазар минатата недела, при што показателот се зголеми за над 20 отсто од најниското ниво во октомври. Врвните стратези на Волстрит се поделени во однос на она што претстои.
Дејвид Костин од „Голдман Сакс“ (Goldman Sachs Group Inc.) очекува дека добивките ќе продолжат, додека другите сектори ќе го достигнат растот на технолошките акции. Мајкл Вилсон од „Морган Стенли“ (Morgan Stanley), пак, наместо тоа, укажува на мечкиниот пазар од 40-тите, кога S&P 500 порасна за 24 отсто пред да се врати на ново најниско ниво.
