Акциите пораснаа по договорот во САД, трговците го чекаат Пауел

Фјучерсите на американските акции напредуваа, а пораснаа и азиските акции откако викендов беше постигнат договор со кој се избегна блокада на американската влада. Трговците чекаат да ги слушнат ставовите на шефот на Федералните резерви, Џером Пауел, во случај да има какви било индиции за тоа колку дополнително ќе треба да се зголемат стапките.

Фјучерс-договорите на индексот S&P 500 се зголемија во понеделникот, откако американските законодавци доцна во саботата усвоија компромисна легислатива со која Владата ќе функционира до 17 ноември. Јапонските акции пораснаа, додека голем број азиски пазари, вклучувајќи ги и тие во Кина и Јужна Кореја, беа затворени поради празници.

На инвеститорите им олесна исто така и поради податоците што во текот на викендот покажаа дека кинеската производствена активност се зголемила, за првпат по шест месеци, секако и поради знаците дека некои делови од економијата на оваа нација повторно се на добар пат. Јужна Кореја, пак, објави побавен пад на извозот.

„Финансиските пазари се подготвуваа за блокада во САД, а сега има елемент на олеснување, но тоа е само привремено подигнување на еден од облаците што сега висат над пазарите“, рече Јунг-Ју Ма, главен инвестициски директор во „БМО Велт менаџмент“ (BMO Wealth Management). „Каматните стапки и хаосот на ФЕД остануваат име на актуелната ’игра’ и главен двигател на пазарите во следните неколку недели“.

Додека на пазарите се чувствува олеснувањето од договорот со САД, вниманието брзо се префрла на Пауел, кој денеска ќе учествува на еден настан, на кој и ќе дискутира. Податоците за производствената активност и работните места во САД исто така ќе бидат во центарот на вниманието оваа недела, откако шефот на њујоршки Фед изјави во петокот дека креаторите на политиката треба да ги остават каматните стапки високи некое време.

Bloomberg Mercury

„Колку подолго време траат високите каматни стапки во услови на построга фискална политика и повисоки приноси на обврзниците, барем на краток рок, толку повеќе ќе доаѓа до закрепнување и влијание врз економијата и ќе предизвикува забавување и рецесија веројатно во првата половина на 2024 година“, рече Васу Менон, управен директор за инвестициска стратегија во „Оверси-чајнис бенкинг корп“ (Oversea-Chinese Banking Corp.) на телевизијата „Блумберг“, осврнувајќи се на американската економија.

Приносите на државните трезорски хартии од вредност се искачија низ кривата, при што оние на 10-годишниот долг се зголемија за четири базични поени, на 4,61 проценти. Петгодишните приноси се зголемија за сличен износ, на 4,66 отсто, за на затворањето повторно да бидат на највисокото ниво во последните 16 години.

Bloomberg Mercury

Банката на Јапонија објави дека в среда ќе спроведе дополнителна операција за купување државни обврзници. Фјучерсите на 10-годишните обврзници ги намалија загубите по известувањето, а јенот остана слаб, на околу 149,8 јени за долар.

Во моментов нема коментари за веста. Биди прв да коментира...

Остави коментар