Долгот на САД е преценет, велат од „Барклис“

Инвеститорите треба да размислат за продажба на 10-годишни американски државни обврзници, бидејќи силата на економијата го прави неодамнешниот пораст на американските обврзници пренадуен и неоправдан, велат аналитичарите на „Барклис“ (Barclays).

Приносите на реперот за глобалниот долг паднаа за речиси 30 базични поени од годинашното високо ниво од 4,35 отсто, а инвеститорите се уверени дека Федералните резерви (Фед) ќе ги намалат каматните стапки порано отколку што се мислеше. Падот на приносите е „чуден“, со оглед на тоа што американските економски податоци се покажаа подобри од очекувањата во последните недели, напишаа во белешка стратезите, меѓу кои и Аншул Прадан и Амрут Нашикар.

„Податоците сугерираат дека американската економија останува еластична, а пазарот на трудот генерира солиден раст на реалниот приход“, напишаа стратезите. „Неодамнешното отскокнување во изминатите неколку недели изгледа неосновано и препорачуваме кратки позиции за 10-годишните американски државни обврзници“, додаваат тие.

Ставовите за тоа кога и со кое темпо Фед може да започне со намалување на каматните стапки се сменија од почетокот на 2024 година. Често спротивставените податоци и реториката од претставници на централната банка ги наведоа инвеститорите да ги преиспитаат своите прогнози. Пред овие препораки на аналитичарите за 10-годишните обврзници беа објавени мешани податоци за американскиот пазар на трудот, а во вторник го чекаме извештајот за инфлацијата.

Пазарите на свопови предвидуваат намалувања за нешто помалку од еден процентен поен до крајот на годинава, а се смета дека првото сигурно намалување ќе се случи во јули. Претседателот на Фед, Џером Пауел, и неговите колеги минатата недела сигнализираа дека централната банка се приближува до намалување на каматните стапки, зајакнувајќи ја увереноста на аналитичарите.

Приносот на 10-годишниот долг беше стабилен на 4,07 отсто во азиското тргување во понеделникот.

Аналитичарите на „Барклис“ рекоа дека зголемувањето на понудата во наредните месеци и целта на Фед да го намали вкупниот рок на достасување на долгот, исто така, предупредуваат на претпазливост.

„Веруваме дека слабите податоци веројатно повторно покажуваат само половина од сликата - како што беше целата мината година - и дека економските фундаменти остануваат силни“, напишаа тие. Иако Фед се чини дека се држи до својата основна линија за намалување на каматните стапки почнувајќи од годинава, „според наше мислење, причината за обемен циклус на олеснување е ослабена“.