.webp){kind=icon}
Европските акции достигнаа рекордно високо ниво, придружувајќи им се на нивните пандани од Волстрит, бидејќи оптимизмот околу економскиот раст и потенцијалното олеснување на монетарната политика го продолжија минатогодишниот подем.
Индексот Stoxx Europe 600 се искачи за 0,9 отсто, на 495,71 поени, надминувајќи го својот претходен врв, кој го достигна во јануари 2022 година. Добивките во четвртокот беа поттикнати од технолошките акции откако „Енвидија“ (Nvidia Corp.) испорача уште една неверојатна прогноза за продажба.
Исто како и во САД, концентрацијата на приносите е голема тема во Европа, со само четири акции што сочинуваат 65 отсто од добивките во реперот од почетокот на годината. Производителот на опрема за чипови АСМЛ (ASML Holding NV), данскиот производител на лекови „Ново Нордиск“ (Novo Nordisk A/S), германскиот софтверски гигант САП (SAP SE) и францускиот производител на луксузни стоки ЛВМХ (LVMH) забележаа двоцифрена добивка во 2024 година.
Надвор од поединечните индустрии, знаците за еластична глобална економија го поттикнуваат расположението на инвеститорите. Во исто време, облозите дека глобалните централни банки ќе почнат да ги намалуваат каматните стапки во текот на годинава се исто така турбопоттик за акциите и веќе поставија рекорд за американскиот репер S&P 500.
Bloomberg
Чарлс-Хенри Моншау, главен инвестициски советник во „Сиз“ (Banque Syz Group), вели дека европските акции нема да бидат шокирани дури и ако растот во еврозоната разочара.
Високите вреднувања за врвните европски изведувачи се „оправдани со супериорниот раст на заработката, силниот биланс и одржливата конкурентска предност“, рече тој.
Довербата во акциите од сферата на луксузот исто така се враќа, при што еластичните продажби во ЛВМХ предизвикуваат пошироки добивки.
Сепак, делумниот стимул од Кина доведе до слаби перформанси во основниот сектор на ресурси. Малопродажбата исто така заостанува, оптоварена од резултатите на „Ејч енд ем“ (Hennes & Mauritz AB). Некои стратези, вклучувајќи го и Макс Кетнер во ХСБЦ (HSBC Holdings Plc), предупредија дека биковскиот сентимент можеби оди предалеку.
Други контрираат дека европските акции се недоволно поседувани, тврдејќи дека неодамнешниот раст е концентриран кај американските и акциите поврзани со технологија.
„Има простор за проширување на растот“, вели Емануел Кау, стратег во „Барклис“ (Barclays Plc).
