Пазарот на обврзници во САД порасна бидејќи знаците за заладување на пазарот на труд ги поттикнаа шпекулациите дека Федералните резерви (Фед) може да ги намалат каматните стапки оваа година.
Само една недела пред состанокот на Фед, извештајот ЏОЛТС (JOLTS) покажа дека отворените работни места во САД паднале на најниско ниво од 2021 година. Овие податоци ги подигнаа цените на државните обврзници, а приносите на 10-годишните обврзници го продолжија својот четиридневен пад, намалувајќи се за речиси 30 базични поени, пишува „Блумберг“ (Bloomberg).
Првото намалување на каматните стапки сега се предвидува во ноември, со поголеми изгледи за намалување во септември. И покрај овие очекувања, акциите се мачеа да постигнат значителни добивки бидејќи вестите за послаб пазар на труд не беа доволно привлечни за многу трговци.
Според Бил Адамс од Comerica Bank, позитивната страна на приказната е што се намалува ризикот од притисоци врз платите кои ја поттикнуваат инфлацијата, давајќи им на Фед поголема флексибилност отколку пред неколку години.
Веројатно затоа претседателот на Фед, Џером Пауел, беше смирен кога инфлацијата забрза на почетокот на оваа година, велејќи дека зголемувањето на каматите е малку веројатно.
„Се трупаат докази дека Фед треба да почне да олеснува“, изјави за „Блумберг“ Роналд Темпл, главен пазарен стратег во Lazard.
Приносите на десетгодишните државни обврзници паднаа за шест базични поени на 4,33 отсто. Dow Jones зајакна 0,36 отсто, додека Nasdaq за 0,17 отсто. Индексот S&P 500 зајакна 0,15 отсто, завршувајќи на 5.291,34 поени.
Цената на нафтата падна на најниско ниво во околу четири месеци, откако планот на ОПЕК+ за олеснување на ограничувањата на производството оваа година дополнително го влоши песимистичкото расположение на пазарот. Цената на бакарот падна под 10.000 долари. Биткоинот надмина 70.000 долари.
.webp){kind=icon}
