Одлуката на Фед ги раззелени американските берзи

Акциите во Соединетите Американски Држави (САД) скокнаа во средата, а приносите на обврзниците паднаа по одлуката на Фед да ги остави каматните стапки на сегашното ниво, со дополнителни сигнали дека стапките би можеле да паднат во септември.

Федералниот комитет за отворен пазар (FOMC) гласаше за задржување на референтната каматна стапка во опсег од 5,25 до 5,5 проценти. Каматните стапки во САД се на тоа ниво од јули минатата година.

Одлуката ја раззелени американската берза, така што Dow Jones Industrial Average напредуваше за 0,24 отсто, додека Nasdaq и S&P 500 скокнаа за 2,64 и 1,58 отсто, соодветно. Ова е најголем дневен пораст на индексите Nasdaq и S&P 500 од крајот на февруари.

Банката на федерални резерви не донесе одлука што ќе прави во септември, иако е посигурна дека се приближува моментот за намалување на каматните стапки, изјави претседателот на Фед, Џером Пауел.

„Ќе донесеме одлука врз основа на податоците за инфлацијата, како и податоците за пазарот на трудот, ризиците во двете области и рамнотежата во која ќе бидат тие ризици“, рече Пауел на прес-конференција.

Намалувањето може „да следува уште на наредниот состанок“, но Фед ќе носи одлуки врз основа на статистички податоци, а не „само еден изолиран извештај“, додаде централниот банкар. „Можам да замислам сценарио каде што воопшто не ги намалуваме стапките годинава, но исто така и сценарио каде што ги намалуваме стапките повеќекратно“, заклучи Пауел.

„Пазарите не добија многу конкретни информации од соопштението на Фед. Меѓутоа, ако податоците продолжат да укажуваат на слабеење на економијата, може да се запрашаме дали Фед чекаше премногу долго“, изјави Крис Ларкин од „Морган Стенли“ (Morgan Stanley) за „Блумберг“.

Од корпоративните вести, „Боинг“ (Boeing) ја именуваше Кели Ортберг за нов извршен директор. „Мастеркард“ (Mastercard) оствари подобар профит од очекуваниот, а „Интел“ (Intel) планира да укине илјадници работни места за да ја зголеми профитабилноста со намалување на трошоците.

Синџирот кафетерии „Старбакс“ (Starbucks) забележа резултати во согласност со очекувањата на аналитичарите, а „Пинтерест“ (Pinterest) предупреди дека неговиот приход од продажба во овој квартал може да биде помал од очекувањата на аналитичарите.