Федералните резерви на Соединетите Американски Држави одлучија да не ги менуваат каматните стапки за задолжување во земјата и на состанокот во јули, па каматните стапки во САД повторно останаа на највисоко ниво во последните 23 години.
Федералниот комитет за отворен пазар гласаше за задржување на целната референтна каматна стапка од 5,25 до 5,5 проценти. Каматните стапки во САД се на тоа ниво од јули минатата година. Ваква одлука очекуваа аналитичкиот тим на „БлумбергАдрија“, како и аналитичарите анкетирани од „Блумберг“.
Сите централни банкари гласаа да се остават каматните стапки на нивното сегашно ниво.
Растот на американската економија забрза повеќе од предвиденото во вториот квартал, покажувајќи дека побарувачката останува силна и покрај повисоките трошоци за задолжување.
Според последните расположливи податоци, бруто домашниот производ на САД во вториот квартал порасна со стапка од 2,8 отсто на годишно ниво, по растот од 1,4 отсто во претходниот период. Главниот двигател на економскиот раст – личната потрошувачка, порасна за 2,3 отсто, што е исто така повеќе од предвиденото.
Внимателно следената мерка на базичната инфлација порасна за 2,9 отсто, стеснувајќи од првиот квартал, но сепак над прогнозите, покажа извештајот на Бирото за економски анализи.
Иако темпото на раст е забрзано во однос на првиот квартал, бројките сепак покажуваат забавување во однос на минатата година. Потрошувачката и пошироките економски активности стивнаа под товарот на високите каматни стапки, што во исто време помага постепено да се заузда инфлацијата.
.webp){kind=icon}
