Забава на берзите: Американска бура, берзанска забава и криптоманија

Минатонеделното тргување на берзите беше обележано главно со политичките превирања во САД. Старо-новиот претседател Доналд Трамп се враќа во Белата куќа, што беше прославено на пазарите на капитал.

Како одговор на изборот на Трамп сите главни американски берзански индекси пораснаа за неколку проценти. Главниот американски индекс S&P 500, на пример, го забележа својот најголем постизборен пораст во историјата, објави „Блумберг“ (Bloomberg). Поединечните акции, особено тие што му припаѓаат на кругот на „пријатели“ на Трамп, како „Тесла“ (Tesla) и акциите во индексот Russell, запишаа раст меѓу 10 и 20 проценти.

Берзанските индекси S&P 500 и Dow Jones во текот на минатата недела забележаа раст од 4,7 отсто, NASDAQ порасна за 6,5 отсто, а MSCI World за 3,8 проценти. Помал раст на неделно ниво е забележан кај европските индекси, при што германскиот Dax доби 1,5 отсто, 50-те европски акции собрани во индексот EuroStoxx 50 остварија принос од седум отсто, додека 600-те акции во индексот Stoxx600 забележаа принос од само 0,9 проценти.

 

Bloomberg Adria

По изборите направивме преглед и за тоа кои акции треба повеќе да се следат. Во првите редови се акциите на „Тесла“ на Илон Маск, близок пријател на Доналд Трамп, како и акциите на нафтените компании „Шлумбергер“ (Schlumberger) и „Халибартон“ (Halliburton), но и акциите на Банката на Америка (Bank of America).

Голема забава на криптопазарот

Се поставуваат нови рекорди на криптопазарот, а забавата сè уште трае. Главните криптовалути ја зголемија вредноста за неколку проценти за само 24 часа на денот по изборите, и тоа биткоинот порасна за осум проценти, на 74 илјади долари, етерот за шест проценти, на 2.570 долари, а солана за 16 проценти, на 184 долари.

Биткоинот сè уште соборува рекорди. Во моментот на пишување неговата вредност е на ниво од околу 79.000 долари (нешто над 73.500 евра), а последниот рекорд го достигна вчера, кога токенот во еден момент чинеше 79.771 долар. Трамп беше неформален кандидат на криптоиндустријата бидејќи за време на претседателската кампања тој вети дека ќе ги направи САД криптоцентар на планетата и ќе воспостави национална резерва за биткоини.

Како се одразија изборите на пазарот на стоки?

Се префрламе на пазарот на суровини. Додека нафтата ВТИ (WTI-West Texas Intermediate) и северноморската нафта брент (Brent) минатата недела поскапеа за 4,5 и 3,4 проценти соодветно, златото загуби 1,4 отсто од вредноста. Благородниот метал се смета за сигурна инвестиција за време на економски и геополитички превирања, а неговата цена обично најмногу се зголемува за време на ниски каматни стапки.

Bloomberg Adria

Но златото солидно се продаваше на аукциите во текот на целата година, зголемувајќи ја својата вредност годинава за околу 30 проценти. Движењата не се должат толку на исходот од изборите во САД колку на неизвесноста од ескалација на геополитичките тензии на многу кризни жаришта низ светот. На ова ја додаваме и монетарната политика на Федералните резерви на САД (Фед), но и очекувањата на инвеститорите дека финансиските пазари се зрели за порадикална надолна корекција на цените.

„Златото поскапува речиси една година поради геополитиката, купувањето на централните банки и поголемата побарувачка од земјите на БРИКС“, изјави за „Блумберг Адрија“ аналитичарот на „Ејсикс“ (Acex) Тилен Шарлах.

Федералните резерви на САД во четвртокот ги намалија каматните стапки за 25 базични поени. Претседателот на Фед, Џером Пауел, не ја исклучува можноста за ново намалување на каматните стапки во декември. Bloomberg

Доларот зајакнува, еврото слабее

Доларот зајакна во однос на другите валути, а скокнаа и приносите на 10-годишните државни обврзници на САД. Минатата недела еврото загуби 0,7 отсто во однос на доларот. Трамп во интервју за „Блумберг“ (Bloomberg) во текот на летото рече дека вредноста на доларот е превисока и ја кочи извозната активност на САД.

„Трамп предлага мерки што краткорочно ќе го зајакнат американскиот долар. Воведувањето нови тарифи, намалувањето на имиграцијата и намалувањето на даноците имаат инфлаторен ефект, што би го принудило Фед или да ја зголеми каматната стапка или да ја намалува побавно од другите земји“, смета Рок Брезигар, менаџер на средства во „НЛБ фондови“, кој проценува дека тоа би ја зголемило разликата меѓу каматните стапки на САД и другите земји, што би резултирало со одлив на капитал во САД и, последователно, би ја зголемило вредноста на доларот.

Регионални берзи

Нема драматични превирања на регионалните берзи поради случувањата во САД и во Германија, која западна во сериозна политичка и економска криза. Индексите се движеа околу основната линија. Како и претходната недела, се истакна сараевскиот индекс SASE10, кој минатата недела забележа раст од 3,2 отсто, а македонскиот МБИ индекс порасна за 1,8 проценти.

Но добивме нов играч на хрватската берза. Акциите на трговецот „Студенац“ ќе котираат и на Загрепската и на Варшавската берза, слично како и акциите на словенечка „Крка“.

Со издавање нови акции како дел од понудата за финансирање понатамошен динамичен раст на бизнисот, вклучувајќи преземања и проширување на продажната мрежа, „Студенац“ има намера да ги зголеми бруто-приливите на околу 80 милиони евра и да ја намали задолженоста, напишаа хрватските колеги.

 

НЛБ ја започнува сезоната за објава на финансиските резултати

Во Словенија сезоната на објавување на резултатите од словенечките блучипови започна со објавување на деловните резултати на НЛБ. НЛБ во третиот квартал оствари приходи од 320 милиони евра, а нето-добивката изнесува 135,5 милиони евра, објави во четвртокот Љубљанската берза.

 

 

Акцијата на НЛБ реагираше на деловните резултати на банката со раст од 3,2 отсто на неделно ниво, додека словенечкиот берзански индекс SBITOP неделата ја заврши со раст од 0,6 отсто. Полошо помина хрватскиот индекс CRO10, губејќи 0,6 отсто на неделно ниво.

Следната недела словенечките блучипови ќе продолжат да објавуваат деловни резултати. „Телеком Словенија“ е компанијата што прва ќе ги објави своите квартални резултати в среда, а потоа „Крка“ в четврток и „Петрол“ в петок.

На кои настани ќе обрнуваме внимание неделава?

Понеделник, 11 ноември

• Државниот завод за статистика на Македонија (ДЗС) ќе објави податоци за издадени одобренија за градба, за продажни цени на производители на индустриски производи и за туризам, сите податоци ќе бидат за септември.

Вторник, 12 ноември

• Во Германија ќе се објават октомвриските податоци за инфлацијата.

Среда, 13 ноември

• Во САД ќе бидат објавени податоци за инфлацијата.

Четврток, 14 ноември

• Во Обединетото Кралство ќе се објават податоци за БДП за третиот квартал.
• „Евростат“ ќе ги објави податоците за БДП за еврозоната, невработеноста и индустриското производство.

Петок, 15 ноември

• ДЗС ќе објави податоци за вредноста на договорени и извршени градежни работи во странство во третиот квартал, потоа податоци за промет во индустријата во септември, за цените во земјоделството во октомври и за откуп и продажба на земјоделски производи во третото тримесечје.
• Јапонија ќе објави податоци за БДП.
• Во Кина ќе се објават податоци за невработеноста и индустриското производство.
• Во Франција ќе бидат објавени податоци за инфлацијата.