Биткоинот одново постави рекорд и се доближува до 80.000 долари

Биткоинот за прв пат се приближува до вредносната граница од 80.000 долари, главно поттикнат од прифаќањето на дигиталните средства од страна на новоизбраниот претседател Доналд Трамп и шансите за Конгрес во кој ќе учествуваат прокрипто законодавци.

Криптовалутата денеска се искачи за дури 4,3 проценти до досега невидена вредност од 79.771 долари и засега е стабилна на нивото од близу 79.000 долари (73.700 евра). Помалите токени како кардано (Cardano) и доџкоин (Dogecoin), исто така закрепнаа.

Трамп во текот на предизборната кампања вети дека ќе ги стави САД во центарот на индустријата за дигитални средства, вклучително и создавање стратешки резерви на биткоин и именување регулатори на дигитални средства. Тој во вторникот излезе од изборите со позиција посилна од очекуваното - неговата Републиканска партија има контрола врз Сенатот и е на чекор да има тесно мнозинство во Домот.

Движење на цената на биткоинот Bloomberg Mercury

 

„Со оглед на тоа што прашината од победата на Трамп сè уште се спушта, само прашање на време беше кога ќе се случи некаков скок со оглед на перцепцијата дека Трамп е прокрипто ориентиран и тоа е она што го гледаме сега“, рече Ле Ши, генерален директор во „Аурос“ (Auros) од Хонгконг.

ЕТФ, ФЕД

Биткоинот само годинава ја зголеми својата вредност за околу 90 проценти, главно потпомогнат од големата побарувачка за наменските фондови со кои се тргува во САД (ЕТФ), како и поради намалувањето на каматните стапки од страна на американските Федерални резерви (Фед). Порастот на најголемиот дигитален токен, кој најновите рекорди ги достигна по гласањето за претседател во САД, ги надминува приносите од инвестиции како акции и злато.

Откако на ден пред изборите најголемите ЕТФ се соочија со рекорден дневен нето одлив на средства, кога загубија околу 580 милиони долари (за што пишувавме и поопширно може да прочитате на овој линк), тие за четвртокот објавија рекорден дневен нето прилив од речиси 1,4 милијарди долари, покажуваат податоците собрани од „Блумберг“ (Bloomberg).

Сепак, познавачите на крипто пазарот уште пред изборите посочија дека ветувањата за поддршка на дигиталните валути сами по себе не се пресудни за движењето на цената, туку на нив гледаат само како на чист популизам. Самото расположение на пазарот, односно шпекулациите се тие кои ја движат цената. Таа се формира единствено од понудата и побарувачката. Професионалците кои ги контактиравме ден пред американските претседателски избори не прогнозираа како ќе се движи цената на криптовалутите по гласањето, особено на биткоинот, туку само посочија на претпазливост со инвестициите за време на изборите. Но, јасно посочија дека овие избори несомнено ќе имаат значајно влијание на крипто пазарот, особено во регулаторна и геополитичка смисла, бидејќи сѐ поголем капитал се влева во оваа индустрија.

Последните два пасуса не се дел од оригиналниот текст и се допишани од Мирјана Јовеска („Блумберг Адрија“).