Крипто „миксер“ осуден на 12 и пол години затвор за перење пари

Основачот на сервисот за мешање криптовалути, познат како „Биткоин Фог“ (Bitcoin Fog) доби казна затвор во времетраење од 12 и пол години за перење десетици милиони долари од сивите пазари, каде се продавале нелегални дроги.

Роман Стерлингов (36) вчера беше осуден на 150 месеци затвор во федералниот суд во Вашингтон од страна на американскиот окружен судија Рандолф Мос, кој исто така нареди и конфискување на 395 милиони долари и неговиот удел во паричникот со биткоини на „Биткоин Фог“, проценет на повеќе од 103 милиони долари. Стерлингов, кој има руско и швајцарско државјанство, во март беше осуден од поротата под обвинение поврзано со работата, како што велат обвинителите, на една од „најголемите и најдолготрајни служби за перење пари“.

Стерлингов обезбеди услуга која ги меша дигиталните токени за да го отежне наоѓањето на изворот на приходите од незаконските активности. Обвинителите рекоа дека „Биткоин Фог“ цела деценија обработува трансакции на кои не може да им се следи трагата, вклучително и некои од познатите нелегални пазари. Стерлингов е осуден за здружување заради перење пари, перење пари и две обвиненија се поврзани со водење на нерегистрирана услуга за пренос на пари.

„Роман Стерлингов испра над 400 милиони долари стекнати по криминален пат преку 'Биткоин Фог', неговата услуга за 'мешање' на криптовалути која беше отворена за работа со криминалците кои сакаат да ги сокријат валканите пари“, изјави главната заменичка на помошникот јавен обвинител, Никол М. Аргентиери, која раководи со криминалистичката служба на Министерството за правда. „Денешната предуда ја нагласува посветеноста на Министерството за правда кон тоа тие кои помагаат во криминални активности целосно да сносат одговорност за нивните злосторства“, додаде таа.

Вчера во судот Стерлингов изрази каење. „Жал ми е за каква било штета што настанала од моите постапки. Јас сум посветен на тоа да станам подобра личност“, му рече тој на судијата.

Мос изрече значајно помала затворска казна од 30-те години, колку што бараше владата и максималните 50 години што ги пропишува американското законодавство. „Доживотната затворска казна се чини несоодветна со нивото на вина, но казната треба да биде доволно строга за да ги одврати другите, особено во крипто светот каде што властите тешко ги фаќаат криминалците“, рече судијата.

Обвинителите бараа строга казна поради големината и времетраењето на шемата. „Ова е криминална активност од неверојатни размери во подолг временски период“, рече Кристофер Браун, обвинител во случајот.

На судењето Стерлингов сведочеше дека ја користел „Биткоин Фог“, но не управувал со услугата. Неговиот адвокат, Тор Екеланд, рече дека нема искази на очевидци или дневници за услугите што докажуваат дека неговиот клиент ја водел услугата. Бранителите на Стерлингов бараа од судијата да не добие повеќе од седум и пол години затвор.