Брокерските куќи свртеле промет од над 500 милиони евра: Кој е кој на пазарот?

Драстично зголемување на прометот во тргувањето со хартии од вредност на Македонската берза и на странските пазари имало во минатата година во споредба со претходната година, откриваат новите податоци на Комисијата за хартии од вредност за работењето на овластените правни лица кои имаат довзола за работа со хартии од вредност.

На Македонската берза лани тие оствариле вкупен промет од 26,8 милијарди денари (435 милиони евра), што е зголемување за 190,2 проценти во однос на претходната година. На странските пазари лани бил остварен вкупен промет од 6,3 милијарди денари (103 милиони евра), што е зголемување за 116,6 проценти во споредба со 2023 година. Во Македонија функционираат 11 правни лица што работат со хартии од вредност, од кои пет се брокерски куќи, а преостанатите шест се банки што имаат посебни оддели за работа со хартии од вредност. Анализиравме кои од нив остваруваат најголем промет и какви се трендовите во нивното работење.

Прво трио на домашниот пазар

Во минатата година најголем промет на Македонската берза во износ од околу осум милијарди денари (130 милиони евра) остварила брокерската куќа „Еурохаус“, по која следуваат брокерската куќа „Илирика инвестментс“ со промет од 7,4 милијарди денари (120 милиони евра) и Дирекцијата за хартии од вредност на „Комерцијална банка“ со промет од 4,2 милијарди денари (68,8 милиони евра).

Во 2024 година пад на прометот остварен на Македонската берза споредено со претходната година се забележува само кај „Иново Брокер“ и тоа за 41,2 проценти, додека најголемо зголемување на остварениот промет од 348,5 проценти има кај брокерската куќа „Инвестброкер“.

Кој е најголем играч на странските пазари?

Во 2024 година пет учесници на пазарот за хартии од вредност (четири банки и една брокерска куќа) ја вршеле услугата тргување на странски пазари. Најголем промет од 3,1 милијарда денари (50,5 милиони евра) остварила „Шпаркасе банка“. На второто место е „Стопанска банка Скопје“ со остварен промет од околу милијарда денари (17,8 милиони евра), а на третотот место е „Комерцијална банка“ со промет од 973,8 милиони денари (15,8 милиони денари).

Од КХВ нагласуваат дека минатата година кај сите пет пазарни учесници регистрирано е зголемување на приходите од тргување со хартии од вредност на странските пазари и тоа кај „Инвестброкер“ за 240,2 проценти, кај „Шпаркасе банка“ за 146,1 проценти, кај „Стопанска банка Скопје“ за 133,4 проценти, кај „НЛБ Банка“ за 69,5 проценти и кај „Комерцијална банка“ за 30,8 проценти.

Растот на прометот резултира со зголемени приходи

Единесетте овластени правни лица за работа со хартии од вредност лани оствариле вкупни приходи од 224 милиони денари, што е зголемување за 137,2 проценти во однос на претходната година. Најголем дел од вкупно остварени приходи произлегуваат од надоместоци и провизии (89,68 проценти).

Највисок износ на вкупни приходи во 2024 година од 58 милиони денари (944.000 евра) остварила  „Еурохаус“, што е зголемување за 211,8 проценти во однос на 2023 година. На второто место е „Илирика инвестментс“ со приходи од 51,7 милиони денари (840.000 евра), а на третото место е „Инвестброкер“ со приходи од 36,6 милиони денари (595.000 евра).