Американсите берзи со мали добивки во пресрет на симпозиумот на ФЕД

Американските акции го завршија тргувањето со мала добивка, исто како и европските, што може да потврди дека инвеститорите се внимателни пред одлуката на Федералните резерви (ФЕД) за зголемување на каматната стапка.

На крајот од тргувањето индексот S&P 500 заврши со раст од 0,29 отсто, индексот DJIA порасна за 0,18 проценти, додека технолошкиот индекс Nasdaq 100 забележа раст од 0,41 отсто.

Во текот на тргувањето најдобро поминаа акциите од секторот енергетика, недвижнини и финансии, додека акциите на компаниите од секторите информатичка технологија и здравствена заштита заостануваа на тргувањето со своите резултати.

Инвеститорите и натаму се двоумат за големи инвестиции во пресрет на говорот на претседателот на ФЕД, Џереми Пауел, на годишниот симпозиум на банкарите од американските централни банки, што треба да се одржи во петок, а на кој што би требало да се знае повеќе за идното заострување на монетарната политика како одговор на инфлацијата.

Меѓутоа, инвеститорите во изминатите неколку недели веќе слушаа најави од официјалните лица на ФЕД за заострување на монетарната политика и зголемување на каматната стапка.

Економските податоци, врз основа на кои ФЕД ги носи одлуките за висината на зголемувањето на каматната стапка, се мешани. Податоците од средата покажуваат дека продажбата на куќите во САД падна на најниско ниво од почетокот на пандемијата. Меѓутоа, според последните податоци од јули инфлацијата забави, што покажува дека мерките на ФЕД даваат ефект.

Јулските статистички податоци даваат надеж дека инфлацијата можеби го достигна врвот после повеќе од една година на континуиран раст на цените. Сепак, во САД цените и натаму се на високо ниво. Дел од економистите предупредуваат дека уште е рано да се каже дека инфлацијата почнува да оди во трајна надолна линија.