Инвеститорите сè повеќе вложуваат во волатилни сектори на пазарот на акции, игнорирајќи ги предупредувањата, додека индексот S&P 500 се приближува до својот историски максимум.
Сепак, ризиците остануваат: паузата во царините што ја воведе претседателот Доналд Трамп истекува за две недели, сè повеќе има знаци на забавување на економијата и пад на довербата на потрошувачите, а воените случувања и натаму тлеат во заднина. Стратезите од Волстрит советуваат вложување во компании со силни биланси што можат да издржат ненадејни потреси. Сепак, инвеститорите како да ги игнорираат сите тие пораки.
Invesco S&P 500 High Beta ETF, берзански фонд што ги следи акциите со висока волатилност, е на пат да го забележи најдобриот квартал од 2020 година во однос на Invesco S&P 500 Low Volatility ETF. Истовремено, индексот на „Голдман Сакс“ што ги мери перформансите на акции на компании со слаби биланси се движи кон најдобриот месечен резултат во споредба со S&P 500 од јануари наваму.
„Ова е само почеток на фазата на страв од пропуштање, која се јавува во доцните фази на секој структурен раст на пазарот, без исклучок“, вели Џулијан Емануел, главен стратег за акции и квантитативна анализа во компанијата „Еверкор“ (Evercore ISI). „Изненадувачка е брзината со која пазарот ги прифати шпекулациите, имајќи предвид колку расположението беше песимистичко пред само нешто повеќе од два месеца, и покрај тоа што сè уште постои голема неизвесност околу економијата и политиката“.
Bloomberg
Клучна улога имаат малите инвеститори, кои претпочитаат „замав“ на акции како големите технолошки компании и шпекулативни имиња. Тие продолжија да купуваат и на почетокот на април, кога S&P 500 беше на работ на пазарот во пад, додека институционалните инвеститори масовно продаваа за време на царинската криза.
Купувањето при пад функционира
„Да се сетиме на сите падови на пазарот во последно време, почнувајќи од коронавирусот“, вели Пол Нолте, пазарен стратег и советник за управување со богатство во фирмата МСВМ (Murphy & Sylvest Wealth Management). „Секојпат кога пазарот краткорочно потонува, инвеститорите научија: купувај при пад и вложувај во акции со повисок бета-коефициент“.
Големите технолошки компании беа главен мотор на пазарот во последните две години. Тие имаа краток застој на почетокот на годината кога кинескиот стартап „Дипсик“ (DeepSeek) предизвика загриженост околу доминацијата во развојот на вештачка интелигенција, но технолошките гиганти брзо го повратија приматот, предводејќи силно закрепнување на S&P 500 по царинскиот пад.
„Штом царините почнаа да се повлекуваат, инвеститорите се вратија на доминантната тема, а тоа е вештачката интелигенција“, смета Кит Лернер, коосновач на инвестициски стратегии во компанијата ТАС (Truist Advisory Services).
Технолошките гиганти го кочат малиот бизнис
Фокусот на големите технолошки компании дури кочи еден од поризичните делови на пазарот – секторите со мала пазарна капитализација. Индексите Russell 2000 и S&P 600, при што вториот опфаќа само профитабилни помали фирми, заостануваат зад S&P 500 и оваа година и овој квартал.
Стратезите истакнуваат дека технологијата има релативно помал удел во индексите на малите фирми. Технолошкиот сектор и комуникациските услуги заедно сочинуваат речиси 43 отсто од S&P 500, но само околу 13 отсто во Russell 2000 и 16 отсто во S&P 600.
Растот на технолошките фирми дополнително го поттикнува растот на профитот на ниво на индекс. Процените покажуваат дека заработката на компаниите од S&P 500 годинава ќе порасне за околу 8 отсто во однос на лани, при што за технолошкиот сектор се очекува скок од речиси 21 отсто. Очекувањата за другите сектори бледнеат во споредба со тоа.
„Во време на неизвесност за корпоративните заработки, инвеститорите гравитираат кон сектори што нудат долгорочна приказна“, вели Лернер.
.webp){kind=icon}
Во моментов нема коментари за веста. Биди прв да коментира...