Кети Вуд промовира бафер ЕТФ-ови дизајнирани да ги ограничат загубите

„Арк Инвестмент Менаџмент“ ДОО на Кети Вуд се префрла на брзорастечкиот пазар за бафер ЕТФ-ови дизајнирани да ги ограничат загубите од акции, во време кога нејзините технолошки фондови продолжуваат да ги намалуваат средствата. Инвестициската фирма минатата недела поднесе документација за лансирање на четири фондови што се тргуваат на берза, кои имаат за цел да ги заштитат инвеститорите од загуби на пазарот на акции, а сепак да понудат раст. Идејата е едноставна: Кога акциите паѓаат, ЕТФ-овите го амортизираат падот, заштитувајќи ги инвеститорите од некои загуби. Кога пазарот расте, тие остваруваат добивки, иако и тие се ограничени.

Во случајот на „Арк“, секој фонд има период од 12 месеци што се ресетира на ротациона основа, почнувајќи од јануари, април, јули и октомври, според поднесоците до Комисијата за хартии од вредност на САД. Доколку бидат одобрени, ЕТФ-овите ќе имаат за цел да ги ограничат загубите на околу 50 проценти од секој пад на цената на акциите на 6,8 милијарди долари вредниот „АРК Иновејшн ЕТФ“ (ARK Innovation ETF - ARKK), додека истовремено ќе овозможат целосно учество во добивките над утврдената пречка од околу 5 проценти.

„Овие се како ‚Арк‘ на диета. Инвеститорите веројатно им велат ‚ни се допаѓа вкусот и шлагот, но би сакале да го намалиме кофеинот и шеќерот‘“, рече Ерик Балчунас, виш аналитичар за ЕТФ во „Блумберг Интелиџенс“ (Bloomberg Intelligence). „Па можеби би сакале да се откажат од малку од добивките за малку мирен сон при загуби.“

Фондовите се „АРК Кју 1 Иновејшн ЕТФ“ ( ARK Q1 Defined Innovation ETF - ARKI), „АРК Кју2 Дифајнд Иновејшн ЕТФ“ (ARK Q2 Defined Innovation ETF - ARKJ), „АРК Кју3 Дифајнд Иновејшн ЕТФ“ (ARK Q3 Defined Innovation ETF - ARKL) и „АРК Кју 4 Дифајнд Иновајшн ЕТФ (ARK Q4 Defined Innovation ETF 0 ARKM). Таксите за управување не беа откриени.

Портпаролот на „Арк“ не одговори на барањето за коментар.

Поднесувањето доаѓа во време кога осумте активно управувани ЕТФ-ови на „Арк“ забележаа нето одливи од над три милијарди долари во текот на изминатите 12 месеци, при што две милијарди долари се повлечени само од ARKK, покажуваат податоците собрани од „Блумберг“. Одливите продолжија и покрај тоа што сите фондови остварија двоцифрени добивки во истиот период, бидејќи технолошките фондови се опоравија од нестабилноста предизвикана од царините. Поширокиот пазар, исто така, се опорави, делумно потпомогнат од повлекувањето на некои од неговите поагресивни трговски предлози од претседателот Доналд Трамп.

Водечкиот ARKK беше во пораст од 50 проценти во текот на изминатата година, додека вториот по големина, АРК Некст Генерејшн Интернет ЕТФ (ARK Next Generation Internet ETF -  ARKW) вреден две милијарди долари, се тргува повисоко за околу 80 проценти. Од април, двата го победија S&P 500.

Множеството предложени ЕТФ-вои потсетуваат на пандемијата, кога структурираните производи поврзани со АРК ЕТФ (Ark ETF) издадени од „ЏП Морган“ (JPMorgan Chase & Co.) и „Морган Стенли“ (Morgan Stanley), меѓу другите, доминираа на пазарот. Структурираните обврзници се должнички хартии од вредност кои користат деривати за да обезбедат изложеност на основна актива, како што е кошничка со акции или ЕТФ.

„Има многу луѓе таму кои сакаат поголема гаранција“, рече Балчунас. „Има толку многу неизвесност, што ако можете да понудите некаква гаранција, луѓето ќе платат за тоа.“

И покрај растот оваа година кај фондовите на Вуд, ентузијазмот кај следбениците на мало исчезна, далеку од нејзината популарност за време на златните денови во 2021 година кога месечните приливи од повеќе милијарди долари не беа невообичаени. ARKK е на добар пат за својот 19-ти последователен месечен одлив, покажуваат податоците собрани од „Блумберг“, додека ARKW забележа флуктуации на тековите.

Таканаречените ЕТФ-ови со бафер, познати и како фондови со дефиниран исход, се дел од поширокиот бум на фондовите управувани од деривати за кои „Блекрок“ (BlackRock Inc.) проектира дека би можеле да достигнат 650 милијарди долари до 2030 година, бидејќи инвеститорите бараат нови стратегии за хеџирање и диверзификација на портфолијата. Средствата под управување за категоријата достигнаа речиси 69 милијарди долари во 2025 година, покажуваат податоците од „Блумберг Интелиџенс“.

Атрактивноста на ЕТФ-овите со бафер може да биде силна на тековниот пазар обележан со остри осцилации и изненадувања. S&P 500 достигна рекордни максимуми претходно оваа година, се повлече поради трговските тензии, а потоа доживеа неочекуван раст.

Многу традиционални ЕТФ-ови со бафер се дизајнирани за инвеститорите да го држат производот во текот на целиот период на исход за целосно да имаат корист од заштитата од пад. Влегувањето или излегувањето во средината на периодот може да резултира со различна изложеност на ризик/принос од првично рекламираната. Други, како „Прошерс“ (ProShares), лансираа дневни варијанти, кои ги ресетираат нивоата на ризик секој ден.

За Мохит Баџаџ од „ВалахБет Капитал“ (WallachBeth Capital), потегот има смисла за Вуд - познат избор на акции - со оглед на успехот на бафер ЕТФ-овите.

„Таа се надева дека нејзините сегашни клиенти кои се лојални евентуално ќе ги купат тие средства наместо да одат кај конкурент“, рече директорот на ЕТФ-овите на фирмата. „Таа само нуди уште еден производ на својата линија, како што треба.“