„Дојче банк“ се враќа во индексот Euro Stoxx 50 по седумгодишна пауза

„Дојче банк“ (Deutsche Bank AG) повторно го зазеде своето место во главниот берзански индекс на еврозоната, седум години откако беше исфрлена од листата.

Германскиот кредитор им се придружува на „Сименс енерџи“ (Siemens Energy AG) и белгиската биотехнолошка компанија „Аргенкс“ (Argenx SE), кои исто така се промовирани во индексот Euro Stoxx 50, соопшти во понеделникот администраторот на индексот ISS Stoxx. Тие ги заменуваат производителот на 5Г-опрема „Нокиа“ (Nokia Oyj), автомобилскиот концерн „Стелантис“ (Stellantis NV) и производителот на коњак „Перно Рикар“ (Pernod Ricard SA), чии акции беа погодени од тарифите на американскиот претседател Доналд Трамп.

„Дојче банк“ беше отсутна од Euro Stoxx 50 од 2018 година, губејќи го своето место само неколку месеци откако актуелниот извршен директор Кристијан Шевинг ја презеде функцијата. За враќањето беше заслужен силниот раст  на европските кредитори во 2025 година, при што акциите на „Дојче банк“ се зголемија повеќе од двојно во изминатите 12 месеци.

Добитниците и губитниците во Европа се прикажани во изборот за индексот

Bloomberg

„Сименс енерџи“, уште едно германско засилување во индексот, забележа повеќе од тројно зголемување на акциите од септември лани и беше една од најуспешните компании во Европа минатата година, во услови на бум на глобалната побарувачка за електрична енергија. Компанијата неодамна соопшти дека очекува да ја достигне горната граница на својата годишна проекција, благодарение на нарачките за гасни турбини и опрема за електрични мрежи.

Акциите на „Аргенкс“ пораснаа за 30 отсто во изминатата година, поттикнати од позитивните резултати на белгиската компанија специјализирана за рак и автоимуни заболувања. Силен импулс дадоа и податоците за продажбата и клиничките испитувања. Аналитичарите остануваат оптимистички расположени за „Аргенкс“, со речиси унисони препораки за купување и очекувања за значителен раст на цената на акциите.

Напротив, акциите на „Нокиа“ паднаа за околу 7 отсто во изминатата година, бидејќи финската компанија се справува со тарифите на Трамп и со последиците од послабиот долар, поради што во јули ја намали својата проекција за профит.

Акциите на „Стелантис“ се намалени за повеќе од 46 отсто во последните 12 месеци, при што хаосот со тарифите само ги зголеми проблемите додека компанијата се обидува да ја подобри продажбата во САД и Европа. Дополнителен удар беше тоа што ѝ беа потребни околу шест месеци да назначи нов извршен директор, откако во декември го отстрани претходниот.

Акциите на „Перно Рикар“ паднаа за 24 отсто од последниот годишен преглед на индексот. Таа компанија, заедно со нејзините европски конкуренти, стана една од првите корпоративни жртви на глобалната трговска војна, кон кои целат Кина и САД. Сепак, резултатите за август беа светла точка, надминувајќи ги очекувањата на аналитичарите.

Последните промени во Euro Stoxx 50 беа направени откако германската одбранбена компанија „Рајнметал“ (Rheinmetall AG) во јуни беше забрзано вклучена во индексот, на сметка на сопственикот на „Гучи“ (Gucci), „Керинг“ (Kering SA).

Администраторот на индексот во понеделникот објави промени и во поширокиот индекс Stoxx 600, меѓу кои е и додавањето на француската биотехнолошка компанија „Абивакс“ (Abivax SA), откако нејзините акции забележаа раст од над 850 отсто во јули. „Фрапорт“ (Fraport AG) е меѓу новододадените, додека „Герешхајмер“ (Gerresheimer AG) е една од компаниите што ќе отпаднат.

Сите промени ќе стапат во сила со отворањето на европското тргување на 22 септември.

Сè поголемата популарност на пасивните фондови значи дека членството во клучните индекси станува сè поважно за акциите, бидејќи може да поттикне зголемена побарувачка од таканаречените индекс-фондови.