Добивките на европските компании се многу посилни отколку што изгледаат

Европските компании остваруваат едни од најсилните резултати во последните неколку години, создавајќи услови регионалните акции да достигнат нови рекордни нивоа, додека аналитичарите стануваат уште пооптимистични за широк спектар сектори.

Резултатите се силни според речиси сите показатели: добивките на компаниите во индексот MSCI Europe скокнаа 14 отсто, а повеќе од половина од неговите членки ги надминаа процените за вториот квартал. И двата показатели се највисоки од почетокот на 2023 година, според податоците што ги собра Блумберг Интелиџенс.

Секторот на суровини и натаму е еден од главните придонесувачи, благодарение на повисоките цени на нафтата. Но дури и просечната компанија во индексот Stoxx 600 пријави раст на добивката по акција од седум отсто во однос на истиот период лани, со што се намали разликата во однос на нејзиниот пандан од индексот S&P 500, покажуваат податоците на „Голдман Сакс“ (Goldman Sachs Group Inc.).

„Растот на добивките во Европа и натаму е значително посилен отколку што се перципира“, изјави стратегот на „Голдман“ Питер Опенхајмер. „Консензусот влезе во сезоната со поконструктивен став од вообичаено, но сепак ја потцени силата на основните фундаментални показатели.“

Европските добивки на пат кон најголем скок од 2023 година

Уделот на компании што ги надминаа очекувањата е исто така највисок во последните три години

Забелешка: Податоците за вториот квартал се заклучно со 31 јули/Извор: Bloomberg

Тоа претставува голема промена во однос на претходните неколку години, кога компаниите речиси и не бележеа раст на добивките поради слабата економска активност. Дополнително, отсуството на технолошки гиганти во Европа несразмерно им одеше во прилог на американските акции.

Овојпат, меѓутоа, инвеститорите силно ги наградуваат европските акции додека трае сезоната на објавување финансиски резултати. Акциите на компаниите што ги надминаа процените на аналитичарите за добивката во просек го надминаа индексот Stoxx 600 за 1,6 процентни поени во следната трговска сесија, што е двојно подобар резултат отколку во претходниот квартал, покажуваат податоците на „Ситигруп“ (Citigroup Inc.).

Подеднакво изразени беа и движењата кај акциите на компаниите што не ги исполнија очекувањата. Тие заостанаа зад реперниот индекс за 2,3 процентни поени, што претставува најсилна негативна реакција на пазарот во последните четири години, покажуваат податоците на „Ситигруп“.

Сепак, индексот како целина достигна рекордни нивоа, при што и реперните индекси како францускиот CAC 40 и германскиот DAX поставија нови историски максимуми. Stoxx 600 втор месец по ред има подобри перформанси од S&P 500, а во вторникот достигна уште еден историски максимум во текот на тргувањето.

Релативната вреднуваност на европските акции расте

Попустот на Stoxx 600 според коефициентот цена/добивка (P/E) во однос на американските акции е најмал од 2022 година.

Извор: Bloomberg

„Инвестициското опкружување во Европа е навистина интересно бидејќи растот се темели на реални резултати, а не на претпоставки“, изјави Виолета Тодорова, виш истражувачки аналитичар во „Левериџ шеарс“ (Leverage Shares). „Тоа е вистинска промена во однос на Европа од последните неколку години, која беше евтина со причина.“

Индексот Stoxx 600 сега се тргува со очекуван коефициент цена/добивка (forward P/E) од 15, што е над неговиот долгорочен просек од 13, според податоците собрани од Блумберг. Релативната вреднуваност на индексот во однос на S&P 500, иако сè уште е пониска, е највисока од јануари 2022 година.

Аналитичарите ги зголемуваат прогнозите за добивките на европските компании

Ова е најдолгата низа нагорни ревизии од 2022 година

Извор: Citigroup, Bloomberg

Охрабрува тоа што аналитичарите и натаму ги зголемуваат очекувањата за добивките во широк спектар сектори, што укажува на можност за понатамошен раст на цените на акциите. Податоците на „Голдман Сакс“ покажуваат дека во јули прогнозите за добивките беа зголемени во сите сектори, освен кај основните суровини и секторот на дискрециона потрошувачка, при што најголеми нагорни ревизии имаа технолошкиот и енергетскиот сектор.

Алпеш Пател, управувачки партнер во „Рутбриџ капитал“ (RootBridge Capital), изјави дека поповолните изгледи за добивките имаат „уште поголема тежина кога се придружени со подобрување на економската доверба, поголема фискална потрошувачка и поширока структура на финансискиот, индустрискиот, одбранбениот и инфраструктурниот сектор“.

„Европа не мора да стане Силициумската Долина. Доволно е да престане да ги разочарува инвеститорите и да понуди алтернатива за капиталот што бара диверзификација надвор од приказната за вештачката интелигенција и надвор од американскиот пазар“, рече Пател.